Governu Timor-Leste

Vise-Primeiru-Ministru no Ministru Koordenadór Asuntus Sosiais, hamutuk ho Asosiasaun Médiku Timor-Leste (AMTL), promove kampaña saúde komunitária iha loron 25 fulan-abríl tinan 2026, iha Suku Guruça, Postu Administrativu Kelikai Antigu, Munisípiu Baukau, ne’ebé benefisia ema na’in-539 ho konsulta gratuita no fahe ai-moruk. 

Durante loron rua, hala’o serbisu kuidadu médiku ba labarik, adultu, inan-isin-rua no ferik-katuas sira. Iha loron daruak de’it hala’o konsulta ba ema hamutuk na’in-314. Ekipas médikas fornese konsulta jerál, sukat tensaun arteriál, teste raan, no mós kampaña sensibilizasaun kona-ba moras la hada'et sira hanesan diabetes, ipertensaun no problema kardíaku (fuan), no mós kona-ba importánsia hosi alimentasaun ida ne’ebé ekilibradu no prátika ezersísiu fíziku ne’ebé regulár.

Kampaña sensibilizasaun ne'e mós inklui disponibilizasaun ferramenta diagnóstiku komplementár sira, inklui eletrokardiograma, ekokardiograma, raiu-X, ekografia no servisu báziku laboratóriu nian, hodi reforsa kapasidade resposta klínika iha terrenu.

Atividade hirak ne’e hala’o iha koordenasaun ho servisu saúde lokál, liuliu Serbisu Saúde Munisipál Baukau no Sentru Saúde Kelikai, ne’ebé inklui atividade rastreiu (buka-hatene sinál sira)  no imunizasaun. Alola Foundation apoia atividade rastreiu (buka-hatene sinál sira) kankru serviks no susun nian.

Iha nia diskursu, Vise-Primeiru-Ministru destaka importánsia hosi inisiativa hodi hakbesik servisu saúde nian ba populasaun sira ne'ebé dook liu.

"Governu nafatin komprometidu hodi hadi'a setór saúde, tanba labele alkansa progresu ekonómiku no sosiál bainhira laiha populasaun ne'ebé saudavel. Prevensaun maka dalan ne'ebé efikás liu", nia hatete.

Governante ne'e mós refere investimentu ne'ebé la'o hela atu hadi'a servisu saúde, inklui aumentu fornesimentu ai-moruk, reforsu infraestrutura, no hadi’a kualidade atendimentu.

Atividade ne’e hetan partisipasaun husi Vise-Ministru ba Operasionalizasaun Ospitais, Flávio Brandão, Prezidente Autoridade Munisipál Baukau, Veneranda Lemos, membrus AMTL, lideransa komunitária no membru komunidade sira.