Governu halibur responsavel sira ba área Kultura no Informasaun hodi koordena Komité ASEAN-COCI
Iha loron 23 fulan-abríl tinan 2026, membrus governu Timor-Leste ne’ebé responsavel ba área Kultura no Informasaun hala’o sorumutu, iha Dili, ho objetivu atu aprezenta enkuadramentu no objetivu sira husi Komité ASEAN ba Kultura no Informasaun (ASEAN-COCI), koordena atividades nasionál, no mós prepara organizasaun Timor-Leste nian iha Prezidénsia ASEAN iha área ida-ne’e iha tinan 2029.
Sorumutu ne’e lidera husi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, nu’udar reprezentante nasionál altu nivel iha pilár Komunidade Sósiukulturál ASEAN (ASCC) nian, no partisipa husi Ministru Prezidénsia Konsellu Ministrus, Agio Pereira, nu’udar reprezentante nasionál altu nivel iha mekanizmu Ministrus ASEAN ne’ebé responsavel ba área informasaun (AMRI), Sekretáriu Estadu Arte no Kultura, Jorge Soares Cristóvão, no Sekretáriu Estadu Komunikasaun Sosiál, Expedito Dias Ximenes. Partisipa mós ekipa téknika sira hosi departamentu governamentál balun ne’ebé relevante. 
Durante sorumutu ne’e, aprezenta enkuadramentu estratéjiku nasionál no rejionál, inklui artikulasaun entre Planu Estratéjiku Dezenvolvimentu Timor-Leste no vizaun ASEAN nian, nune’e mós papél setór kultura no informasaun hodi promove identidade rejionál, kooperasaun no sirkulasaun konteúdus.
Partisipante sira analiza funsionamentu hosi Komité ASEAN ba Kultura no Informasaun (ASEAN-COCI), ne’ebé nu’udar parte hosi pilár ASCC, ne’ebé kria atu promove kooperasaun rejionál iha área hirak-ne’e, no mós diskute ninia estrutura no operasionalizasaun iha nivel nasionál.
Sorumutu ne’e inklui mós identifikasaun ba inisiativa prioritária no asaun sira ne’ebé atu dezenvolve iha ámbitu preparasaun Prezidénsia Timor-Leste ba ASEAN iha tinan 2029, ho objetivu atu hametin partisipasaun nasionál iha atividade rejionál no mós valorizasaun kultura no mídia hanesan instrumentu kooperasaun no integrasaun nian.
Sesaun ne’e fó dalan hodi konsolida koordenasaun interinstitusionál iha área hirak-ne’e no mós define matadalan kona-ba funsionamentu komité nasionál no kona-ba partisipasaun Timor-Leste iha ASEAN-COCI.
