Governu Timor-Leste

Vise-Ministra ba Asuntu ASEAN, Milena Rangel, lidera delegasaun Timor-Leste iha Sorumutu Funsionárius Importante ASEAN-Rúsia (ARSOM, akrónimu iha lian inglés) nian ba da-22, ne’ebé hala’o iha loron 20 no 21 fulan-abríl tinan 2026, iha Kazan, Rúsia. Sorumutu ne’e hala’o iha kontestu aniversáriu relasaun entre ASEAN no Rúsia ba da-35, hanesan partisipasaun nasionál dahuluk iha mekanizmu ida-ne’e hafoin adezaun plena ba organizasaun rejionál ne’e. 

Sorumutu ne’e prezide hamutuk husi Hau Khan Sum, Reprezentante Myanmar iha Sorumutu Funsionárius Importante (SOM Leader), no husi Andrey Rudenko, Vise-Ministru Negósius Estranjeirus Rúsia nian, no sura mós ho partisipasaun husi reprezentantes Estadus-Membrus ASEAN, Sekretariadu ASEAN no ninia delegasaun sira.

Partisipante sira analiza kooperasaun iha ámbitu Planu Asaun Abranjente ASEAN-Rúsia tinan 2021-2025 nian, ne’ebé daudaun ne’e iha hela faze implementasaun finál, no diskute preparasaun ba kuadru kooperasaun foun ida ba períodu 2026-2030.

Iha sorumutu ne’e, ko’alia kona-ba áreas prioritárias hosi parseria estratéjika, inklui kooperasaun polítika no seguransa, komérsiu no investimentu, enerjia, seguransa alimentár, siberseguransa no kombate krime transnasionál, nune’e mós interkámbiu kulturál, akadémiku no interkámbiu entre joven sira.

Sorumutu ne’e permite mós atu avansa preparativus ba Simeira Komemorativa ASEAN-Rúsia, ne’ebé prevee ona ba fulan-juñu oin mai, iha Kazan, ne'ebé hein katak sei define matadalan estratéjiku sira ba parseria iha tinan hirak tuirmai.