Governu Timor-Leste

Sekretáriu Estadu ba Eletrisidade, Água no Urbanizasaun (SEEAU) Januário Pereira simu hikas estudante timor oan nain 20 (ruanulu) iha Hotel Timor, kuarta 6/04. Graduadu sira ne’e kompostu hosi funsionáriu nain 16 (sanulu resin nen) husi Diresaun Nasionál Servisu Be’e no Saneamentu (DNSBS) no nain 4 (hat) reprezentante hosi ONG nasionál, ba estuda, iha ITS, kona-ba Jestaun Saneamentu no Fornesimentu Bee ba área Rurál sira. Estudu ne’e nu’udar Bolsa estudu ne’ebé hetan hosi Governu Austrália liu hosi Programa Asisténsia nian ba BESIK (Bee, Saneamentu no Ijiene iha Komunidade).

Sekretáriu Estadu, Januário Pereira, iha okaziaun ne’e hateten katak nia kontenti tebes hodi simu hikas graduadu sira hafoin tinan rua sira estuda iha rai liur. Hau hein katak ita boot sira sei bele fó resposta ba problema sira ne’ebé mosu iha terrenu, maske sei infrenta mós obtakulu no dezafiu barak,” Iha tempu hanesan, Sekretáriu, hodi Governu nia naran, fó agradese ba Governu Australia kona-ba apoiu finanseiru liu hosi programa Asisténsia ba BESIK tanba importante tebes ba dezenvolvimentu nasionál Timor-Leste nian.

Graduadu sira sei hala’o servisu iha distritus 13 iha Timor Leste laran tomak.

Serimónia ne’e konta ho partisipasaun hosi SEEAU Januário Pereira, Diretór Jerál Servisu Kooperativu iha Ministériu Infraestrutura, José Mestre, Diretór Jerál ba Sekretariadu Komisaun Funsaun Públika, Abel Fatima, Diretór Nasionál DNSBS, João Jerónimo, reprezentante hosi Programa Asisténsia Governu Austrália, Jeff Prime no responsável ba Programa BESIK, Keryn Clark.