Reabilitasaun estrada urbana Maliana nian reforsa mobilidade no dezenvolvimentu ekonómiku lokál
Iha loron 18 fulan-abríl tinan 2026, Primeiru-Ministru, Kay Rala Xanana Gusmão, akompaña husi Ministru Obras Públikas, Samuel Marçal, inaugura reabilitasaun estrada urbana Maliana nian, iha munisípiu Bobonaru, ho objetivu atu hadi’a mobilidade, fasilita asesu ba atividades ekonómikano reforsa konektividade iha territóriu ne’e. 
Projetu ne’e nu’udar parte hosi investimentu Governu Konstitusionál IX nian iha infraestruturas rodoviárias, ho objetivu atu hadi’a kondisaun sirkulasaun no apoia dezenvolvimentu ekonómiku lokál no nasionál. Estrada ne’ebé hetan ona reabilitasaun abranje kuaze kilómetru 48, entre Nunura no Maliana Vila, inklui estrada sira iha sidade laran.
Projetu ne’e ezekuta husi empreza internasionál rua no finansia husi Estadu, liuhusi Ministériu Obras Públikas, ho investimentu ida liu dolar millaun 33. Molok intervensaun, estrada ne’e ho kondisaun aat, nune’e difikulta sirkulasaun ema no sasán sira, liuliu iha tempu udan.
Durante serimónia ne’e, Prezidente Autoridade Munisípiu Bobonaru, Paulo Moniz Maia, hato’o populasaun sira-nia laran-haksolok no agradesimentu ba benefísiu projetu ne’e, hodi destaka ninia impaktu iha mobilidade, dinamizasaun ekonomia lokál no melloria kondisaun moris.
Iha ninia diskursu, Primeiru-Ministru hateten katak infraestruturas bázikas, hanesan estrada no ponte, kontribui ba dezenvolvimentu nasionál, hodi permite distribuisaun produtu, ligasaun entre komunidade, no mós fó asesu ba servisu no merkadu sira. Nia subliña mós katak melloria ba ligasaun rodoviária fasilita integrasaun área rurál sira iha sirkuitu ekonómiku.
Estrada foun ne’e fó benefísiu diretamente ba populasaun liu rihun 130 hosi munisípiu Bobonaru no mellora asesu ba zona sira ne’ebé iha valór ekonómiku, sosiál no turístiku, inklui Marobo no área sira seluk iha rejiaun ne’e.
Iha serimónia ne’e nia rohan, entrega sertifikadu apresiasaun ba empreza no ekipa sira ne’ebé envolve iha ezekusaun no supervizaun obra ne’e nian.
Serimónia ne’e hetan mós partisipasaun husi Vise-Ministru Asuntus Parlamentares, Adérito Hugo da Costa, Sekretáriu Estadu Eletrisidade, Água no Saneamentu, Santos Noronha, reprezentante husi Embaixada Indonézia no Malázia, Deputada Maria Gorumali Barreto, autoridade munisipál no lokál, reprezentantes hosi Igreja Katólika no membru komunidade sira.
Reabilitasaun ba estrada urbana iha Maliana nu’udar parte hosi projetu lubun ida ne’ebé la’o hela hodi reforsa rede rodoviária nasionál no apoia dezenvolvimentu ekonómiku nasionál.
