Governu Timor-Leste

Duílio Marino Gusmão Araújo da Silva simu pose nu’udar Diretór Ezekutivu ba Ajénsia Promosaun Investimentu no Esportasaun Timor-Leste, I.P. (TradeInvest Timor-Leste), no Roberto da Costa Cabral Lai asume kargu nu’udar Diretór Ezekutivu Adjuntu ba instituisaun ne’ebé hanesan, iha loron 17 fulan-abríl tinan 2026, iha Dili, ba mandatu tinan tolu, iha serimónia ida ne’ebé prezide hosi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay. 

Serimónia ne’e realiza iha Gabinete Vise-Primeiru-Ministru, no konta ho partisipasaun hosi Prezidente Komisaun Funsaun Públika, Agostinho Letêncio de Deus, Komisáriu ba Planeamentu Forsa Traballu, José Telo Soares Cristóvão, no konvidadu sira seluk.

Nomeasaun ba responsavel na’in rua ne’e bazeia ba desizaun Konsellu Ministrus nian iha loron 8 fulan-abríl tinan 2026, nune’e mós despaxu hosi Ministru Koordenadór Asuntus Ekonómikus, ne’ebé rekoñese méritu, kompeténsia téknika no tinan servisu ne’ebé dedikadu hosi dirijente foun na’in-rua ne’e iha instituisaun ne’e.

Durante serimónia ne’e, Francisco Kalbuadi Lay destaka katak konfiansa Governu nian bazeia ba kapasidade no dedikasaun ne’ebé nomeadu na’in-rua ne’e hatudu iha dezempeñu sira-nia funsaun sira iha TradeInvest. Nia hateten mós katak, momentu ida-ne’e marka inísiu ba responsabilidade ida ba Nasaun, liuliu hametin setór ekonómiku no servisu ba populasaun Timor-Leste.

 “Susesu husi imi-nia mandatu sei avalia bazeia ba avansu konkretu sira ne’ebé halo hodi atrai investimentu, habelar oportunidade komersiál no kontribui ba dezenvolvimentu sustentavel ba ita-nia ekonomia”, afirma Vise-Primeiru-Ministru.

Governante ne’e apela mós ba dirijente foun sira atu hala’o sira-nia knaar sira ho sentidu responsabilidade no kompromisu, hodi subliña papél sentrál no estratéjiku hosi TradeInvest iha dezenvolvimentu nasionál.

Prezidente Komisaun Funsaun Públika husu atu kumpre norma no orientasaun sira, no mós reforsa nesesidade atuasaun nian ne’ebé aliña ho objetivu institusionál no interese Estadu nian.

Molok nomeasaun, Duílio Marino Gusmão Araújo da Silva hala’o funsaun nu’udar Diretór Ezekutivu Adjuntu ba TradeInvest Timor-Leste, no Roberto da Costa Cabral Lai, ezerse kargu nu’udar Diretór Marketing no Relasoins Esternas iha instituisaun ne’ebé hanesan.

Dirijente foun sira ne’e asume funsaun ho responsabilidade hodi hametin kapasidade TradeInvest Timor-Leste nian iha promosaun oportunidade investimentu no komérsiu, atu nune’e bele kontribui ba dezenvolvimentu ekonómiku ne’ebé sustentavel iha Timor-Leste.