Governu Timor-Leste

Primeiru-Ministru, Kay Rala Xanana Gusmão, iha loron 16 fulan-abríl tinan 2026, iha Palásiu Governu, Dili, hala’o sorumutu ho responsavel sira hosi Timor Resources hodi akompaña dezenvolvimentu esplorasaun petrolífera iha rai-maran (onshore) Timor-Leste no diskute tranzisaun husi faze esplorasaun ba faze avaliasaun no dezenvolvimentu. 

Durante sorumutu ne’e, reprezentante sira hosi empreza ne’e aprezenta pontu situasaun ba atividade sira ne’ebé la’o hela, hodi destaka perfurasaun ba posu tolu iha rai-maran, iha rejiaun Suai, munisípiu Kovalima, iha ámbitu hosi faze inisiál projetu ne’e. Empreza ne’e informa katak serbisu sira ne’e rejista ona taxa susesu ida ne’ebé aas no daudaun ne’e hala’o hela atividade avaliasaun ba deskobertas ne’ebé halo ona.

Sorumutu ne’e mós fó oportunidade hodi ko’alia kona-ba Timor Resources nia planu atu avansa dezenvolvimentu ba rezervas ne’ebé identifika ona, inklui halo perfurasaun foun ba área sira ne’ebé iha potensiál ba petróleu no gás. Empreza ne’e hatudu ninia vontade atu kontinua halo investimentu ho objetivu atu prodús rekursus enerjétikus iha futuru iha país ne’e.

Diretór-Ezekutivu Timor Resources, Christopher Moyes, afirma katak “Timor Resources fura ona posu tolu iha rai-maran Timor-Leste nian. Daudaun ne’e ami avansa husi faze esplorasaun ba faze avaliasaun no dezenvolvimentu nian. Ohin ami iha oportunidade hodi hasoru malu ho Primeiru-Ministru no fahe ami-nia interese ba projetu ida-ne’e. Ami husu mós ninia apoiu hodi kontinua avansa, atu nune’e bele garante benefísiu tantu ba ami-nia empreza nune’e mós ba Timor-Leste”.

Sorumutu ne’e konta mós ho prezensa husi Julie Bishop, eis-Ministra Negósius Estranjeirus Austrália no atuál asesora empreza nian, no mós Chris McCown, Diretór-Jerál Interinu hosi projetu ne’e, ne’ebé responsavel ba operasaun no Ministru Petróleu no Rekursus Minerais, Francisco da Costa Monteiro.