Governu no KOICA asina akordu subvensaun ba projetu nutrisaun eskolár no restaurasaun florestál
Iha loron 14 fulan-abríl tinan 2026, iha Dili, Governu, liuhosi Ministériu Finansas, asina akordu subvensaun rua ho Ajénsia Kooperasaun Internasionál Koreia (KOICA), ho valór totál maizumenus dolar amerikanu millaun 13, ne’ebé sei uza ba implementasaun projetu sira iha área nutrisaun eskolár no restaurasaun florestál.
Akordu sira-ne’e abranje Projetu Dezenvolvimentu Kapasidade Restaurasaun Florestál no Jestaun Sustentável iha Timor-Leste (2026–2033) no mós Programa Integradu Nutrisaun no Seguransa Alimentár, ne’ebé inklui alimentasaun eskolár, fortifikasaun ai-han no hametin infraestrutura eskolár (2026–2030).
Finansiamentu ne’e sei aloka ba programa rua, ho dolar amerikanu besik millaun 6 ne’ebé aloka ba setór agríkola no florestál, ho responsabilidade Ministériu Agrikultura, Pekuária, Peska no Florestas nian, no mós dolar amerikanu besik millaun 7,2 ba setór edukasaun, hodi apoia merenda eskolár no hadi’a kondisaun iha eskola sira.
Projetu restaurasaun florestál foka ba munisípiu Baukau no Manatutu, ho planu hala’o atividade reflorestasaun, kriasaun viveiru, no kapasitasaun téknika, ho envolvimentu komunidade lokál nian. Projetu ne’e inklui mós rekuperasaun ba área sira ne’ebé hetan degradasaun no reforsu jestaun sustentável ba rekursus naturais.
Programa nutrisaun no seguransa ai-han ne’e sei implementa iha munisípiu barak no ho objetivu atu hadi’a estudante sira-nia alimentasaun, reforsa infraestrutura hanesan dapur eskola nian, no mós promove kadeia fornesimentu ne’ebé bazeia ba produsaun lokál, atu nune’e bele kontribui hodi hadi’a kondisaun saúde no prestasaun alunu nian durante eskola.
Serimónia ne’e hetan partisipasaun hosi membru Governu, reprezentante husi KOICA, parseiru internasionál no autoridade lokál sira.
