Governu Timor-Leste

Iha semana kotuk,  Ministru Obras Públikas, Samuel Marçal hala’o vizita servisu ida ba Indonézia, ho viajen ba Jakarta, Surabaya, no Bekasi, akompaña husi Prezidente Institutu Jestaun Ekipamentus no Apoiu ba Dezenvolvimentu Infraestruturas (IGEADI, IP), Ana Paula da Cruz, Diretór Ezekutivu, Sonio  Anuno Sarmento  da Silva, no mós Xefe Aprovizionamentu Ministériu Obras Públikas nian, Izabel Maria Lay Guterres, ho objetivu atu reforsa kapasidade nasionál iha jestaun, operasaun, no manutensaun ba ekipamentu pezadu sira. 

Vizita servisu ida-ne’e ho objetivu atu apoia sustentabilidade investimentu públiku iha ekipamentus ne’ebé utiliza ba konstrusaun no manutensaun infraestruturas, nune’e mós hatán ba situasaun emerjénsia sira, inklui dezastres naturais.

Durante vizita, delegasaun ne’e hasoru malu ho responsavel sira hosi empreza oioin iha setór nian no vizita instalasaun téknika sira iha Surabaya, Jakarta, no Bekasi. Sira observa sistema manutensaun, servisu pós-venda, no mós padraun operasionál sira  ne’ebé adota ona.

Durante hasoru malu, Ministru hato’o pedidu formál atu empreza sira-ne’e loke reprezentasaun iha Timor-Leste, ho objetivu atu garante asisténsia téknika iha territóriu nasionál, hamenus tempu resposta ba manutensaun ekipamentus,  no hadi’a disponibilidade pesas nian.

Ko’alia mós kona-ba posibilidade atu dezenvolve programa formasaun téknika ba profisionál timoroan sira husi IGEADI, IP, ho hanoin atu hasa’e kapasidades iha operasaun no reparasaun ekipamentu pezadu sira.

Iha vizita ne’e inklui mós sorumutu sira iha ámbitu planu Ministériu Obras Públikas nian ba akizisaun ekipamentus foun, ho prioridade atu reforsa kapasidade  intervensaun iha rede rodoviária nasionál no mós resposta ba situasaun emerjénsia sira.

Viajen ida-ne’e halo parte iha esforsu Governu atu hadi’a efisiénsia operasionál setór infraestruturas nian no asegura utilizasaun sustentável ba ekipamentus ne’ebé Estadu sosa.