Governu reforsa kooperasaun interministeriál ba implementasaun programa iha área saúde no nutrisaun maternu-infantíl
Iha loron 7 fulan-abríl tinan 2026, iha Dili, Ministériu Solidariedade Sosiál no Inkluzaun no mós Ministériu Saúde asina Memorandu Entendimentu ida ba implementasaun programa Bolsa da Mãe Kondisionál ba Saúde Nutrisaun Inan no Oan - BdMK-SANUTRIO, ho objetivu atu hadi’a asesu ba servisus saúde no nutrisaun ba inan isin-rua, inan sira ne’ebé fó susu, no labarik sira to’o tinan tolu, ne’ebé mai hosi família vulneravel sira. 
Programa ne’e reforsa protesaun sosiál no promosaun kapitál umanu, fó prioridade ba loron rihun dahuluk moris nian, ne’ebé nu’udar períodu determinante ba dezenvolvimentu fíziku no kognitivu labarik sira nian.
Inisiativa ne’e nu’udar rezultadu hosi abordajen inter-setoriál ida ne’ebé liga servisu saúde ho mekanizmus protesaun sosiál, no mós prevee atribuisaun apoiu kondisionál sira ne’ebé insentiva asesu ba konsulta molok tuur-ahi no hafoin tuur-ahi, vasinasaun, akompañamentu nutrisionál, no mós asaun sensibilizasaun kona-ba prátika estilu moris saudavel.
Durante serimónia ne’e, Ministra Saúde afirma katak memorandu ne’e nu’udar pasu ida hodi hametin kolaborasaun institusionál ho hanoin atu hadi’a nutrisaun no servisus protesaun sosiál ne’ebé dirije ba populasaun sira ne’ebé vulneravel liu, liuliu inan isin-rua, inan ne’ebé fó susu, no labarik sira to’o tinan tolu. Nia mós destaka importánsia hosi akompañamentu durante siklu moris nian, hosikedas idade reprodutiva to'o dezenvolvimentu labarik nian.
Ministra ne’e mós refere kontribuisaun husi parseiru sira, liu-liu iha apoiu ba servisu saúde sira hanesan konsulta molok tuur-ahi no hafoin tuur-ahi, promosaun fó de’it susubeen inan nian, avaliasaun nutrisionál, no mós kampaña hamutuk iha nivel komunidade.
Iha okaziaun ne’ebé hanesan, Ministra Solidariedade Sosiál no Inkluzaun afirma katak memorandu ne’e formaliza kompromisu institusionál atu investe iha saúde no nutrisaun maternu-infantíl, ho atensaun espesiál ba família sira ne’ebé iha situasaun vulneravel, no mós reforsa integrasaun entre sistema protesaun sosiál no sistema saúde nian.
Programa ne’e hetan apoiu hosi parseiru internasionál sira no inklui asinatura hosi akordu tékniku adisionál sira ba ninia ezekusaun operasionál.
Serimónia ne’e hetan partisipasaun husi reprezentantes institusionais, dirijentes, téknikus, no parseiru kooperasaun sira.
Programa BdMK-SANUTRIO sei hala’o tuir faze, ho objetivu atu mellora indikadores nutrisaun maternu-infantíl nian no mós hametin dezenvolvimentu sustentável.
