Governu Timor-Leste

Ministru Negósius Estranjeirus no Kooperasaun, Bendito dos Santos Freitas, partisipa iha Diálogu Ministeriál Nivel Altu kona-ba tranzisaun sustentável kategoria hosi País Menus Dezenvolvidu (PMD), ne’ebé realiza iha Phnom Penh, Kamboja, husi loron 31 fulan-marsu to’o loron 2 fulan-abríl tinan 2026, iha ámbitu revizaun médiu prazu hosi Programa Asaun Doha ba  País Menus Dezenvolvidu sira (2022–2031). Durante eventu, nia hala'o enkontru bilaterál ho reprezentantes governu no Nasoins Unidas nian. 

Diálogu ne’e organiza hosi Governu Kamboja, iha kolaborasaun ho Nasoins Unidas, inklui Eskritóriu Altu Reprezentante ba País Menus Dezenvolvidu sira, País sira ne’ebé iha hela Dezenvolvimentu ne’ebé Laiha Tasi-ibun no Estadu Illa Ki’ik sira ne’ebé iha hela Dezenvolvimentu (UN-OHRLLS) no mós Komisaun Ekonómika no Sosiál Nasoins Unidas nian ba Ázia no Pasífiku (ESCAP). Inisiativa ne’e ho objetivu atu halo revizaun médiu prazu nian ba implementasaun rejionál Programa Asaun Doha nian, ne’ebé foka ba identifikasaun medidas hodi asegura prosesus tranzisaun ne’ebé sustentável.

Iha nia intervensaun, Ministru hato’o apresiasaun kona-ba realizasaun forum ne’e no subliña katak revizaun ne’e ho objetivu atu identifika dalan prátika sira ne’ebé bele garante  tranzisaun sira ne’ebé lori ba reziliénsia ida ne’ebé boot liu, iha kontestu internasionál ida ne’ebé ezijente. Nia hateten katak, ba Timor-Leste, prosesu ida-ne’e nu’udar oportunidade ida atu reforsa baze ekonomia nian ida ne’ebé diversifikada, reziliente, no inkluzivu liu, tuir Planu Estratéjiku Dezenvolvimentu 2011–2030.

Ministru mós destaka Timor-Leste nia esperiénsia, hodi salienta katak kreximentu sustentável ezije transformasaun ekonómika ida ne’ebé kle’an liu, reforsu kapasidade interna sira, no mós ezisténsia parseria konfiável no aliñadas ho prioridades nasionál. Nia mós subliña katak nasaun sira ne’ebé iha hela tranzisaun kontinua hasoru dezafiu estruturál, inklui limitasaun iha diversifikasaun ekonómika no limitasaun iha kapasidade, nune’e presiza mantein apoiu hosi parseiru dezenvolvimentu sira ba reforsu institusionál no mós asesu ba finansiamentu no teknolojia.

Durante eventu ne’e, nia hasoru malu ho Vise-Primeiru-Ministru no Ministru Negósius Estranjeirus no Kooperasaun Internasionál Kamboja nian, Prak Sokhonn. Enkontru ne’e foka ba hametin relasaun bilaterál no identifikasaun área kooperasaun foun, liuliu iha área ekonomia, komérsiu, turizmu, no edukasaun.

Ministru mós hasoru malu ho Subsekretária-Jerál Nasoins Unidas no Alta Reprezentante ba País Menus Dezenvolvidu sira, Rabab Fatima, no aborda Timor-Leste nia prioridades iha kuadru  Programa Asaun Doha nian, kompromisu ba Objetivu Dezenvolvimentu Sustentável, no mós envolvimentu nasionál iha plataforma multilaterál sira.

Iha ámbitu hosi ajenda bilaterál, partisipa mós iha enkontru ida ho Ministra Komérsiu Kamboja, Cham Nimul, iha ne'ebé diskute oportunidades ba kooperasaun ekonómika no komersiál, inklui realizasaun forum negósius no investimentu nian ida entre nasaun rua ne'e.