Governu Timor-Leste

Parlamentu Nasionál iha loron 24 fulan-marsu tinan 2026, iha Dili, aprova iha votasaun finál globál, Proposta Lei n.º 20/VI (3.ª) – Lei Promosaun Esportasaun, ho votu afavór 56, laiha votu kontra no abstensaun.  

Proposta lei ne'ebé agora aprova ona molok ne’e hetan ona aprovasaun iha sorumutu Konsellu Ministrus loron 12 fulan-marsu tinan 2025, tuir proposta hosi Vise-Primeiru-Ministru, Francisco Kalbuadi Lay, nu'udar Ministru Koordenadór Asuntus Ekonómikus.

Aprovasaun ba lei ida-ne’e hanesan parte ida hosi esforsu atu diversifika ekonomia nasionál no hamenus dependénsia ba reseitas hosi Fundu Petrolíferu. Diploma ne’e estabelese kuadru jurídiku ida ne’ebé ho objetivu atu fasilita no insentiva esportasaun beins no servisus, liuhosi promosaun kompetitividade setór privadu no kriasaun kondisaun sira ne’ebé favoravel liu ba komérsiu externu no investimentu.

Lejizlasaun ne’e aliña ho Planu Estratéjiku Dezenvolvimentu Nasionál no mós kompromisu internasionál sira ne’ebé Timor-Leste assume ona, inklui iha ámbitu Organizasaun Mundiál Komérsiu no prosesu integrasaun ba ASEAN.

Entre medida prinsipál sira ne'ebé prevee ona maka simplifikasaun hosi prosedimentus esportasaun nian, ho redusaun hosi rekizitus administrativus, kriasaun hosi insentivu fiskál no administrativu sira ba emprezas esportadoras, no mós rekoñesimentu formál ba entidades ne’ebé hetan ona sertifikasaun. Diploma ne’e inklui mós implementasaun balkaun úniku ida hodi apoia prosesu esportasaun, asaun formasaun ne’ebé dirije ba empreza ki’ik no média sira, no mós promosaun zona ekonómika sira ne’ebé foka ba merkadu externu.

Sesaun plenária ne’e prezide hosi Prezidente Parlamentu Nasionál, Maria Fernanda Lay. Iha sesaun ne’e marka mós prezensa hosi Ministru Komérsiu no Indústria, Filipus Nino Pereira, no mós Vise-Ministru Asuntus Parlamentares, Adérito Hugo da Costa.