Governu Timor-Leste

Polísia Nasionál Timor-Leste (PNTL) ohin, loron 27 fulan-marsu tinan 2026, selebra ninia aniversáriu ba da-26 ho serimónia ofisiál ne’ebé hala’o iha Palásiu Governu, Dili, ho lema “Seguransa Forte ba Futuru ida ne’ebé Seguru”, iha ne’ebé Komandante-Jerál foun, Afonso dos Santos, no Segundu Komandante-Jerál, Natércia Eufrásia Soares Martins, simu pose ba períodu tinan tolu hahú hosi tinan 2026 to'o tinan 2029. 

Serimónia ne’e marka mós prezensa hosi membrus Governu, deputadus hosi Parlamentu Nasionál, ofisiais PNTL no F-FDTL, reprezentantes korpu diplomátiku, sosiedade sivíl, no mós konvidadu sira, no marka inísiu hosi siklu lideransa foun iha instituisaun ne’ebé responsavel ba seguransa públika.

Iha ninia intervensaun, Primeiru-Ministru husu atu hasa’e profisionalizmu iha atuasaun polísia nian no subliña katak atu hatán ba dezafiu sira iha terrenu tenke bazeia ba kompeténsia, dixiplina no dedikasaun ba servisu públiku, nu’udar kondisaun atu asegura estabilidade nasionál no hametin populasaun nia konfiansa.

Xefe Governu destaka importánsia hosi koezaun institusionál, hodi refere ba nesesidade hosi "estrutura ida ne’ebé unida ba dezempeñu ne'ebé garante estabilidade iha ita-nia nasaun", no subliña katak "povu tomak fiar katak ajente polísia sira, hamutuk ho sira-nia komandantes, hamutuk hodi garante estabilidade ita-nia nasaun nian", atu nune'e povu bele moris iha dame, hodi fiar iha prezensa hosi polísia ida ne’ebé kompetente.

Primeiru-Ministru mós hateten presiza halo análize no reflesaun kontínua kona-ba atuasaun instituisaun nian, nu’udar dalan atu prevene problema no hadi’a ninia kapasidade resposta, hodi reforsa knaar PNTL nian iha konsolidasaun Estadu direitu demokrátiku.

Iha diskursu hanesan, nia fó-hanoin kona-ba dezafiu sira ne’ebé relasiona ho kontextu nasionál no internasionál daudaun ne’e, inklui Timor-Leste nia integrasaun iha ASEAN, no mós kalendáriu polítiku ne’ebé prevee ona ho eleisaun prezidensiál tinan 2027, eleisaun parlamentár tinan 2028, no prezidénsia ASEAN nian iha tinan 2029, no mós subliña katak prosesu sira-ne’e ezije preparasaun, koordenasaun institusionál no respeitu ba direitus umanus.

Xefe Governu hato’o ninia konfiansa iha reforma institusionál ne’ebé la’o daudaun no konsidera katak medida sira ne’ebé implementa no rekoñesimentu ba servisu ne’ebé ajente sira presta ona kontribui ba estabilidade nasionál no hametin sidadaun sira-nia konfiansa iha instituisoins.

Iha nia intervensaun, Komandante-Jerál foun ne’e asume kompromisu atu ezerse funsaun ho sentidu responsabilidade no dedikasaun hodi serbí Estadu no populasaun, no mós reafirma katak PNTL tenke hala’o kna’ar nu’udar instituisaun ida ne’ebé la’ós partidária, hodi serbí ba Konstituisaun no lei, nune’e mós garante seguransa interna, orden públika no protesaun ba sidadaun hotu-hotu.

Entre prioridade sira ne’ebé identifika ona ba siklu lideransa foun ne’e, liuliu maka reforsu profisionalizmu no dixiplina institusionál, moderniza PNTL, fortalesimentu investigasaun kriminál no kapasidade hodi hatán ba ameasa sira ne’ebé mosu, reforsu polisiamentu komunitáriu no relasaun konfiansa ho komunidades, no mós intensifikasaun koordenasaun ho instituisaun sira seluk Estadu nian ne’ebé iha responsabilidade ba área seguransa.

Subliña presiza haklean kooperasaun internasionál, liuliu iha kuadru rejionál no ho organizasaun parseira sira, ho objetivu atu hametin kapasidades institusionais no mós fó resposta koordenada ba dezafiu sira seguransa nian.

Iha serimónia ne’e inklui mós referénsia kona-ba perkursu istóriku PNTL nian, ne’ebé marka ho faze oioin dezenvolvimentu institusionál nian, nune’e mós rekoñesimentu ba kontribuisaun hosi lideransa anteriór sira no ajentes ne’ebé, iha tinan barak nia laran, partisipa iha konsolidasaun instituisaun ne’e.

Komemorasaun aniversáriu PNTL ba da-26 ne’e reafirma instituisaun nia kompromisu ba seguransa públika, estabilidade nasionál no servisu ba populasaun.