Forsa Navál F-FDTL ho Forsa Marina Fransés halo ezersisiu hamutuk
Forsa Navál F-FDTL ho Forsa Marina Fransa nian hala’o ezersisiu hamutuk iha tasi laran, entre Dili no Atauro iha sesta-feira semana kotuk, ho objetivu prinsipál atu hasa’e kapasidade no hametin relasaun entre forsa navál rai rua ne’e nian.
Iha ezersisiu ne’e haree liu ba oinsá Forsa Navál Fransa nian hanorin Forsa Navál timor-oan, atu halo kontrolu ba inséndiu, hanesan ahi han ró no bee tama iha ró laran oinsá bele rezolve, ne’ebé ita bolu limitasaun no avaria. Aleinde ne’e mós, tanba forsa navál ninia natureza iha tasi, forsa rua ne’e halo manobra ezersisiu nian, utiliza ró funu Marina Fransa nian ho naran Valdemire no ró patrulla klase Betano no klase Zako hosi Forsa Navál F-FDTL nian.
Ezersisu hamutuk entre forsa hosi Nasaun rua ne’e, hanesan ezersísu rutina, ne’ebé sei hala’o iha tinan rua dala ida.
