Elisa Maria da Silva asume kargu nu’udar Reprezentante Permanente Timor-Leste ba ASEAN
Embaixadora Elisa Maria da Silva simu pose iha loron 19 fulan-marsu tinan 2026, nu’udar Reprezentante Permanente Timor-Leste ba Asosiasaun Nasoins Sudeste Aziátiku (ASEAN), iha serimónia ida ne’ebé prezide hosi Prezidente Repúblika, José Ramos-Horta, iha Palásiu Prezidensiál Nicolau Lobato, iha Dili. Nomeasaun ne’e formaliza reprezentasaun permanente Timor-Leste nian iha organizasaun rejionál ne’e durante faze konsolidasaun partisipasaun nasionál hafoin adezaun plena ba ASEAN. 
Serimónia ne’e hetan partisipasaun hosi Ministru Negósius Estranjeirus no Kooperasaun, Bendito dos Santos Freitas, Vise-Ministra Negósius Estranjeirus no Kooperasaun, Jesuína Maria Ferreira Gomes, Vise-Ministra ba Asuntus ASEAN, Milena Rangel, no dirijentes hosi Ministériu Negósius Estranjeirus no Kooperasaun.
Tuir Konstituisaun Repúblika Demokrátika Timor-Leste, Prezidente Repúblika mak iha kompeténsia atu nomeia embaixadór sira, reprezentantes permanentes, no enviadus estraordinárius, bazeia ba proposta Governu nian. Nomeasaun ba Elisa Maria da Silva hetan formalizasaun liuhosi dekretu prezidensiál, hafoin remata mandatu hosi eis-reprezentante permanente, Natércia Coelho. Elisa Maria da Silva nia naran propoin hosi Konsellu Ministrus, ho inisiativa hosi Ministru Negósius Estranjeirus no Kooperasaun, iha sorumutu loron 7 fulan-janeiru tinan 2026.
Elisa Maria da Silva maka diplomata karreira ida ho esperiénsia tinan rua iha area diplomátika, liuliu iha ámbitu rejionál. Molok hetan nomeasaun ida-ne'e, nia hala'o knaar nu'udar Diretora-Jerál ba Asuntus ASEAN iha Ministériu Negósius Estranjeirus no Kooperasaun, iha ne'ebé nia akompaña prosesu ho rezultadu Timor- Leste nia adezaun plena ba ASEAN iha fulan-outubru tinan 2025. Durante nia karreira, nia mós hala’o knaar iha áreas diplomátikas iha Bankoke, Kamberra no Sydney, no mós kargu diresaun oioin iha Ministériu.
Reprezentante Permanente foun ne’e sei iha misaun atu asegura Timor-Leste nia reprezentasaun iha ASEAN, partisipa iha serbisu Komité Reprezentantes Permanentes nian, koordena ho Sekretariadu organizasaun nian, no mós akompaña implementasaun hosi kompromisu sira ne’ebé asume ona iha kuadru integrasaun rejionál. Ninia mandatu mós halo parte iha preparasaun prezidénsia Timor-Leste nian ba ASEAN, ne'ebé marka ona ba tinan 2029.
Tomada-de-pose ne’e reforsa Timor-Leste nia prezensa institusionál iha ASEAN no kontinua halo serbisu diplomátiku nasionál iha nia kuadru integrasaun rejionál.
