Governu Timor-Leste

Komandu Polísia Nasionál Timor-Leste (PNTL), ne’ebé lidera husi Komisáriu-Jerál Polísia Henrique da Costa, hamutuk ho Primeiru-Ministru Kay Rala Xanana Gusmão, Ministru Interiór, Francisco da Costa Guterres, no membru Governu balun, promove ona ofisiál PNTL hamutuk na’in-62,  iha serimónia ofisiál ida ne’ebé hala’o iha loron 21 fulan-marsu tinan 2026, iha Sentru Formasaun Polísia (CFP, sigla iha lian portugés), iha Dili.  

Promosaun ofisiál sira nu’udar parte hosi polítika Governu Konstitusionál IX nian atu reforsa profisionalizmu, dixiplina no integridade instituisoins Estadu nian, liuliu iha setór seguransa. Prosesu ne’e hala’o tuir despaxu ministeriál n.  15/G-MI/III/2026, loron 19 fulan-marsu, no Rezolusaun Governu  n. 19/2025, loron 25 fulan-marsu, iha kuadru rejime  promosaun tranzitóriu ne’ebé prevee iha Estatutu PNTL nian.

Sistema promosaun ne’e bazeia ba kritériu sira ne’ebé define ona iha lejizlasaun ne’ebé aplika ba karreira ajente PNTL nian, inklui antiguidade, avaliasaun dezempeñu, dixiplina, kompeténsia, formasaun no méritu, ho objetivu atu asegura oportunidade hanesan no evita prátika favoritizmu.

Durante serimónia ne’e, ofisiál na’in-23 hetan promosaun hosi Superintendente Asistente ba Superintendente, na’in-22 hosi Superintendente ba Superintendente Xefe no na’in-17 hosi Superintendente Xefe ba Komisáriu Asistente.

Iha ninia diskursu, Primeiru-Ministru hateten katak promosaun hirak-ne'e reflete rekoñesimentu ba servisu ne'ebé presta ona no kompromisu atu hametin kualidade administrasaun publika no instituisaun seguransa nian. Nia husu ba ofisiál sira atu haforsa profisionalizmu, dixiplina no hakbesik ba komunidade sira, no subliña katak responsabilidade PNTL nian atu prezerva pás no estabilidade sosiál.

Xefe Governu mós alerta kona-ba nesesidade atuasaun imparsiál hosi forsa seguransa no husu atu la bele envolve iha grupu artes marsiais, atu nune’e bele evita konflitu no garante koezaun sosiál. Nia mós defende kona-ba importánsia hosi diálogu ho populasaun, respeitu ba sidadaun sira, no mós prevensaun hosi situasoins instabilidade.

Aleinde ne’e, destaka mós nesesidade atu reforsa partisipasaun feto iha instituisaun, hodi promove oportunidade hanesan no asesu ba knaar lideransa nian.

Serimónia ne’e hetan partisipasaun husi membru Governu sira, lideransa PNTL, no mós membru família husi ofisiál sira ne’ebé hetan promosaun.

Promosaun ne’ebé halo daudaun ne’e nu’udar parte hosi prosesu valorizasaun rekursus umanus no konsolidasaun kapasidade institusionál sira iha setór seguransa.