Ministru Prezidénsia Konsellu Ministrus hasoru malu ho reprezentantes husi Embaixada Estadus Unidus
Ministru Prezidénsia Konsellu Ministrus, Agio Pereira, hasoru malu ho Enkarregadu Negósius Embaixada Estadus Unidus Amérika nian iha Timor-Leste, Bruce Begnell, ne’ebé akompaña hosi responsavel ba Asuntu Polítiku, Ekonómiku no Konsulár misaun diplomátika amerikana nian, Rodney LeGrand, iha sorumutu ida ne’ebé hala’o iha Palásiu Governu, iha Dili, atu analiza tema oioin ne’ebé sai interese komún iha ámbitu kooperasaun bilaterál. 
Durante sorumutu ne’e, Ministru ho diplomata ko’alia kona-ba asuntus ne’ebé relasiona ho kooperasaun institusionál no defeza. Analiza mós prosesu desentralizasaun administrativa ne'ebé la'o daudaun, liuliu medidas ne'ebé ho objetivu atu hametin kompeténsias munisípais no konsolidasaun administrasaun lokál.
Diálogu ne’e inklui mós kestoins ho natureza rejionál, liuliu preparasaun nasionál hodi asume Prezidénsia ASEAN nian iha tinan 2029, nune’e mós inisiativas ne’ebé relasiona ho Timor-Leste nia partisipasaun iha mekanizmus multilaterais.
Ko’alia mós kona-ba inisiativas ne'ebé la'o daudaun atu hametin kuadru legál no institusionál iha área siberseguransa no kombate hasoru siberkrime, nune’e mós mekanizmus koordenasaun inter-institusionál iha área ida-ne'e.
Parte sira mós troka sira-nia persesaun kona-ba kontestu ekonómiku nasionál, inklui projetu estruturál sira hanesan dezenvolvimentu projetu Greater Sunrise no medidas ne'ebé ho objetivu atu hadi'a ambiente investimentu.
