Governu Timor-Leste

Ministru Agrikultura, Pekuária, Peska no Florestas, Marcos da Cruz, lansa iha loron 5 fulan-marsu tinan 2026, iha Laivai, munisípiu Lautein, kampaña kuda hare uza mákinas agríkolas modernas, no entrega mós motokultivadór sanulu ba Autoridade Munisipál Lautein hodi apoia agrikultór lokál sira

Inisiativa ne’e hala’o iha aldeia Samalari, suku Ililai, no hola parte iha polítika modernizasaun setór agríkola nian no hametin produsaun ai-han nasionál. 

Iha serimónia ne'e, Ministru hateten katak atividade ne'e inklui lansamentu kuda hare mekanizadu, liuhosi ekipamentus modernus ba transplantasaun, no entrega motokultivadór sira ne'ebé ho objetivu atu fasilita serbisu agrikultura nian no aumenta produtividade.

Governante ne’e fó hanoin katak, iha fulan-janeiru liubá, inaugura ona sistema irrigasaun Laivai nian, ne’ebé kobre área besik ektare 500. Nia temi katak parte signifikativu ida hosi rai sira-ne’e abandona tiha ona durante tinan barak, maibé agora iha fali produsaun tanba kooperasaun entre Ministériu, autoridades munisipais, no komunidade lokál sira.

Governante ne’e salienta katak tékniku sira husi Ministériu hala’o ona rekuperasaun ba rai agríkola sira, no katak agrikultór sira hahú fali halo kultivasaun ba sira-nia área produtivas, hodi kontribui ba dezenvolvimentu setór agrikultura nian iha munisípiu ne’e.

Ministru Marcos da Cruz indika mós katak hare ne’ebé daudaun ne’e kuda maka variedade lokál Nakroma, ne’ebé dezenvolve ona durante tinan barak no adapta ba kondisaun nasaun nian. Nia hatutan katak Ministériu fó ona apoiu ba produtór sira liuhosi akizisaun no distribuisaun fini sertifikadu, hodi garante kontinuidade ba kampañas agríkolas.

Governante ne’e reafirma ninia kompromisu atu kontinua fó apoiu ba agrikultór sira iha Lautein, iha koordenasaun ho Autoridade Munisipál, ho objetivu atu aproveita tomak área irrigasaun nian no aumenta produsaun foos no mós ai-han sira seluk.

Entrega motokultivadór sanulu ne’e ho objetivu atu hametin mekanizasaun agríkola iha munisípiu ne’e, hodi fasilita agrikultór sira-nia serbisu, nune’e bele hamenus kustu operasionál no hamenus tempu ne’ebé presiza atu prepara rai.

Prezidente Autoridade Munisipál Lautein, Melio de Jesus, agradese ba Governu nia apoiu ba setór agrikultura iha munisípiu ne’e no nia hateten katak ekipamentu foun sira ne’e sei hametin kapasidade produsaun lokál nian. Nia informa mós katak motokultivadór sira ne’e sei distribui tuir nesesidades ne’ebé identifika ona entre agrikultór sira, ho prioridade fó ba produtór sira ne’ebé iha area kultivu sira ne’ebé ativu.

Serimónia ne’e hetan partisipasaun hosi dirijente nasionál sira hosi setór agrikultura, autoridade lokál sira, reprezentantes hosi Polísia Nasionál Timor-Leste, funsionárius públikus, no agrikultór sira husi rejiaun ne’e.