Vise-Ministru Komérsiu no Indústria partisipa iha enkontru kona-ba kooperasaun entre Timor-Leste no Xina
Vise-Ministru Komérsiu no Indústria, Augusto Júnior Trindade, partisipa iha loron 5 fulan-marsu tinan 2026, iha Dili, iha enkontru liuhosi videokonferénsia ho reprezentantes hosi instituisoins akadémikas, organizasoins ekonómikas no sentru investigasaun sira iha rejiaun Ázia-Pasífiku, ne’ebé dedika ba kooperasaun futura entre Timor-Leste no Xina, no organiza hodi komemora aniversáriu ba dala lima kona-ba estabelesimentu Parseria Estratéjiku Abranjente entre Xina no ASEAN. 
Iha nia diskursu, Vise-Ministru agradese mós ba organizadór sira no subliña importánsia hosi diálogu no kooperasaun iha kontestu dezafius ba ekonomia mundiál. Nia destaka mós katak relasaun entre Xina no ASEAN metin nafatin no sai hanesan ezemplu oinsá kooperasaun bele kontribui ba estabilidade no kreximentu ekonómiku rejionál.
Vise-Ministru mensiona mós katak, iha ámbitu progresu Timor-Leste nian iha prosesu integrasaun ba ASEAN, Governu kontinua dezenvolve no halo esforsus atu hametin integrasaun ekonómika liuhosi reforma sira iha fasilitasaun komérsiu, modernizasaun sistema aduaneiru nian, no dezenvolvimentu ekonomia dijitál, hodi refere katak kooperasaun ho parseiru internasionál sira hanesan Xina bele fó apoiu ba implementasaun inisiativa sira-ne’e.
Durante enkontru ne’e, aprezenta área prioridade sira atu hametin kooperasaun iha futuru entre Timor-Leste no Xina, liuliu iha área komérsiu no investimentu, dezenvolvimentu infraestruturas, transformasaun dijitál, adaptasaun ba mudansa klimátika, no dezenvolvimentu kapasidade institusionál.
Enkontru ne’e hetan partisipasaun hosi reprezentante sira hosi Brunei Darussalam, Indonézia, Malázia no Filipinas - Área Kreximentu Leste ASEAN (BIMP-EAGA), Institutu Investigasaun Inisiativa Belt and Road hosi Universidade Tsinghua, Sosiedade Finanseira Internasionál Hong Kong, International Daily, Institutu Sanya ba Investigasaun iha Diplomasia Públika no Organizasaun Kooperasaun Internasionál Zheng He.
