Jesuína Maria Ferreira Gomes simu pose nu’udar Vise-Ministra Negósius Estranjeirus no Kooperasaun
Prezidente Repúblika, José Ramos-Horta, ohin, loron 5 fulan-marsu tinan 2026, fó pose ba Jesuína Maria Ferreira Gomes nu’udar Vise-Ministra Negósius Estranjeirus no Kooperasaun Governu Konstitusionál IX nian, iha serimónia ida ne’ebé hala’o iha Palásiu Prezidensiál Nicolau Lobato, Dili.
Nomeasaun ne’e hala’o liuhosi Dekretu Prezidente Repúblika n. 20/2026, loron 04 fulan-marsu, tuir alínea h) hosi artigu 86.º Konstituisaun Repúblika Demokrátika Timor-Leste nian, ho proposta hosi Primeiru-Ministru, Kay Rala Xanana Gusmão. 
Molok hetan nomeasaun ida-ne’e, Jesuína Maria Ferreira Gomes hala’o knaar nu’udar Xefe Kaza Sivíl hosi Prezidénsia Repúblika. Molok ne’e, okupa mós kargu nu’udar Provedora Direitus Umanus no Justisa.
Kriasaun kargu Vise-Ministra Negósius Estranjeirus no Kooperasaun nu’udar rezultadu hosi alterasaun daruak ba orgánika Governu Konstitusionál IX nian, ne’ebé aprova hosi Konsellu Ministrus iha sorumutu loron 4 fulan-marsu, liuhosi Dekretu-Lei n. 11/2026.
Diploma ne’e prevee inkluzaun hosi Vise-Ministra iha kompozisaun Governu nian, ho responsabilidade atu substitui Ministru Negósius Estranjeirus no Kooperasaun iha nia auzénsia ka impedimentu sira, no mós koadjuva Ministru iha ezersísiu hosi nia funsaun polítika, administrativa no finanseira sira bainhira hala’o polítika esterna nasaun nian, hodi garante ninia unidade no koerénsia.
