Ministériu Edukasaun kontinua reforsa ensinu báziku ho integrasaun profesór 1.143 tan
Iha loron 28 fulan-fevereiru tinan 2026, Governu, liuhosi Ministériu Edukasaun no Komisaun Funsaun Públika, fó pose ba profesór Ensinu Báziku hamutuk 1.143 ne’ebé rekruta tuir programa Bolsa Kandidatus, iha serimónia ida ne’ebé hala’o iha Jináziu Munisipál Dili.
Serimónia ne’e prezide husi Ministra Edukasaun, Dulce de Jesus Soares, no hetan partisipasaun husi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, Prezidente Komisaun Funsaun Públika, Agostinho Letêncio de Deus, no Prezidente Komisaun G Parlamentu Nasionál, no mós responsavel ba Asuntus Edukasaun, Juventude, Kultura no Sidadania, Armando dos Santos Lopes. 
Dosente sira ne’ebé foin simu pose agora sei integra ba iha rejime karreira dosente nian no sei koloka ba iha eskola sira iha territóriu laran tomak, ho objetivu atu substitui profesór sira ne’ebé atinje ona idade reforma obrigatória ka sira ne’ebé ho kondisaun moras lori tempu naruk, nune’e mós atu prenxe lakuna sira ne’ebé identifika ona iha estabelesimentu ensinu báziku sira.
Durante serimónia ne’e, Ministra Edukasaun hateten katak integrasaun husi profisionál hirak-ne’e asegura kontinuidade prosesu aprendizajen iha eskola sira no nu’udar rezultadu husi prosedimentu ne’ebé bazeia ba méritu, liuhusi utilizasaun lista rezerva husi programa Bolsa Kandidatus.
Husi profesór hamutuk 1.143 ne’ebé simu pose, feto na’in-655 no mane na’in-488, ne’ebé fahe ba munisípiu oioin tuir nesesidade ne’ebé Ministériu Edukasaun identifika ona.
Iha ninia diskursu, Vise-Primeiru-Ministru destaka katak profesór sira la’ós de’it funsionáriu públiku, tanba sira hala’o knaar ida ne’ebé determinante hodi fó formasaun ba jerasaun foun sira, ho subliña katak rekursu prinsipál Estadu nian ne’e mak ninia kapitál umanu.
Membru governu no reprezentante institusionál sira ne’ebé marka prezensa mós apela ba profesór foun sira atu ezerse sira-nia kna’ar ho responsabilidade, dedikasaun no espíritu misaun nian, hodi reforsa katak edukasaun mak baze ba transformasaun sosiál no dezenvolvimentu nasionál.
Hosikedas tinan 2024, Ministériu Edukasaun hala'o ona prosesu rekrutamentu tolu iha ámbitu hosi programa Bolsa Kandidatus, ne’ebé integra ona profesór hamutuk 3.732 ba karreira dosente, ne'ebé koloka iha estabelesimentu ensinu sira iha territóriu nasionál tomak.
