MAEOT hala’o sorumutu ho Administradór distritu 13
Ministru Administrasaun Estatál no Ordenamentu Territóriu, iha sexta semana kotuk, loron 18 fulan Marsu, hala’o sorumutu konsellu konsultivu ho Administradór hosi distritu 13 iha salaun sorumutu STAE, Caicoli. Ho objetivu atu avalia servisu Administradór distritu nian, kona-ba oinsá bele atende difikuldade ne’ebé mak komunidade sira hasoru iha área rurál sira.
“Sorumutu iha faze dahuluk iha tinan ida ne’e nian, Ministériu Administrasaun Estatál no Ordenamentu Territóriu halo atu avalia servisu ne’ebé Administradór distritu sira halo iha trimestre dahuluk nian. Iha sorumutu ne’e mós atu sira aprezenta sira nia preokupasaun no problema saida mak durante ne’e sira hasoru iha baze no oinsá buka atu rekolla idea hodi solusiona problema sira ne’ebé iha nivél distritu, sub-distritu nomós iha suku”, hateten Ministru Arcângelo Leite.
