Vise-Ministru Komérsiu no Indústria partisipa iha Sorumutu da-49 Grupu Traballu Nivel Altu nian ba Integrasaun Ekonómika ASEAN
Vise-Ministru Komérsiu no Indústria, Augusto Júnior Trindade, nu’udar Reprezentante Timor-Leste iha Sorumutu Funsionárius Importantes Ekonomia (SEOM) ASEAN nian, partisipa iha Sorumutu da-49 Grupu Traballu Nivel Altu nian ba Integrasaun Ekonómika ASEAN (HLTF-EI), ne’ebé realiza iha sidade Iloilo, Filipinas, iha loron 26 to’o 27 fulan-fevereiru tinan 2026. 
Timor-Leste sai membru plenu ASEAN iha loron 26 fulan-outubru tinan 2025, iha Kuala Lumpur, nasaun agora sai parte husi organizasaun nia órgaun no mekanizmu setoriál oioin. HLTF-EI hanesan forum estratéjiku prinsipál ida ba dimensaun ekonómika ASEAN, hodi halibur responsavel governamentál sira husi Estadu-Membru 11, nune’e mós reprezentante parseiru diálogu sira.
Durante sorumutu, analiza avansus husi integrasaun ekonómika rejionál no diskute implementasaun ba Prioridades Ekonómikas Prezidénsia Filipinas nian ba ASEAN ba tinan 2026, nune’e mós preparativus ba Retiru Ministrus Ekonomia ASEAN, ne’ebé prevee ba fulan-marsu nia klaran.
Entre tema sira iha ajenda maka kona-ba reforma no rasionalizasaun ba mekanizmu sorumutu Komunidade Ekonómika ASEAN nian, estudu kona-ba barreiras naun-pautais, kestoins seguransa ekonómika no jeoekonomia, reforsu mekanizmu monitorizasaun ba implementasaun Komunidade Ekonómika ASEAN no artikulasaun entre integrasaun intra-ASEAN no relasoins ekonómikas esternas.
Kria HLTF-EI iha tinan 2000, liuhusi desizaun Ministrus Ekonomia ASEAN, HLTF-EI serbisu ona hodi define orientasaun estratéjika sira ba integrasaun ekonómika rejionál, inklui elaborasaun Roteirus ba formasaun Komunidade Ekonómika ASEAN, Planu Estratéjiku 2015 no 2025 no Planu Estratéjiku ba períodu 2026-2030.
