Governu harii hikas uma tradisionál hamutuk 46 iha Suai Loro
Governu, liuhusi programa "Abitasaun Digna" husi Ministériu Dezenvolvimentu Rurál no Abitasaun Komunitária, daudaun ne’e harii hikas uma tradisionál hamutuk 46 iha aldeia Loro, iha Suku Suai Loro, Munisípiu Kovalima, ho objetivu atu prezerva identidade kulturál lokál no hadi’a kondisaun abitabilidade populasaun nian. 
Programa ne’e promove husi Ministériu Dezenvolvimentu Rurál no Abitasaun Komunitária, ho tutela hosi Vise-Primeiru-Ministru Mariano Assanami Sabino, no halo parte iha polítika públika sira ne’ebé apoia abitasaun komunitária no valoriza patrimóniu kulturál.
Uma tradisionál sira ne’e, koñesidu iha Tetun Terik hanesan "Laleo Masin", harii ho materiál lokál no téknika tradisionál nian. Abitasaun sira-ne'e barak maka harii iha tinan balun liubá, no balun la hatudu ona kondisaun adekuada, nune’e motiva sira hodi hari filafali.
Xefe Aldeia Loro, Ana Barros afirma katak,’’ Hau Nu’udar autoridade komunitária no mós benefisiária, ha’u sente kontente no agradese ba Governu, liuliu ba Ministériu Dezenvolvimentu Rurál no Abitasaun Komunitária, ne’ebé implementa ona programa rekonstrusaun ba uma Laleo Masin iha ami-nia aldeia.
Abitante ida ho naran ,’’Augusto da Costa, hateten katak programa ne’e lori benefísiu ba komunidade Aldeia Loro tomak, iha ne’ebé maioria populasaun hela iha uma ho tipolojia tradisionál. Nia hatutan tan katak, iha tinan hirak nia laran, abitasaun balun iha kondisaun aat liu ona, tanba nee intervensaun husi Ministériu nian fó dalan atu halo reabilitasaun ba estrutura sira ne’ebé iha.
Jerasaun foun husi Aldeia Loro konsidera katak programa ne’e kontribui hodi prezerva patrimóniu ne’ebé hetan husi bei’ala sira, nune’e mós mantein identidade kulturál ne’ebé moris nafatin iha jerasaun foin-sa’e sira.
Tuir tékniku ida hosi Diresaun-Jerál Abitasaun nian, hosi uma 46 ne'ebé prevee, serbisu hahú iha fulan-Janeiru no, to'o ohin loron, uma 12 hotu ona, no restu sira ne’e prevee, sei remata iha tinan ida ne'e.
Diretor-Jerál esplika katak "Uma tradisionál ho medida metru 7x6, no materiál hotu ne'ebé uza maka materiál lokál,no la uza materiál modernu.
