Governu Timor-Leste

Iha loron Sesta kotuk, loron 18 fulan Marsu nian,  Komunidade polítika no jurídika timor nian asiste konferénsia ida kona-ba “objetivu kontrolu esternu kona-ba Konta sira estadu nian no modelu husi instituisaun superiór kontrolu nian sira”, iha salaun nobre Ministériu Negósiu Estranjeiru nian, iha Dili.

Konferénsia ne’e Ministériu Justisa mak organiza no ninia objetivu prinsipál mak promove debate kona-ba modelu institusionál sira ne’ebé iha posibilidade atu promove fiskalizasaun kona-ba konta sira Estadu nian, tuir ezijénsia hirak ne’ebé Lei-inan RDTL nian prevee.

Guilherme d’Oliveira Martins, Prezidente Tribunal Konta Portugál nian, sai hanesan konvidadu espesiál iha eventu ne’e, ne’ebé konta mós ho apresentasaun hirak ne’ebé  halo husi Eric Muir, konsultór ba auditoria iha servisu saúde Queensland, Austrália nian, no husi José Tavares, hanesan juíz konselleiru iha Tribunál Konta Portugál nian, iha ámbitu kona-ba rejime legál hirak ne’ebé halo tuir hosi rain sira Common law no civilista sira.

Iha ninia diskursu abertura nian, Ministra Justisa, Lúcia Lobato, agradese ba “disponibilidade no kolaborasaun” husi Portugál nu’udar parseiru estratéjiku iha instalasaun Kámara Konta nian ida iha tempu oin mai iha Timor-Leste. Nia mós aprezenta auditór foin-sa’e rua nulu, ne’ebé rekrutadu entre kandidatu atus rua resin, ne’ebé la kle’ur tan sei hahú sira nia programa formasaun nian, molok hola tama iha karreira.

Konferénsia ne’e konta mós ho prezensa husi Primeiru-Ministru, Kay Rala Xanana Gusmão, ne’ebé realsa “jestaun kona-ba rekursu públiku la’ós de’it importante maibé sai mós hanesan obrigatóriu nu’udar dalan protesaun nian atu luta hasoru forma oioin husi fraude no korrupsaun”.

Prezidente Parlamentu Nasionál, Fernando La sama de Araújo, Prezidente Tribunál Rekursu, Cláudio Ximenes, Reprezentante Espesiál  Sekretáriu-Jerál Nasoins Unidas nian iha Timor-Leste, Ameerah Haq no prokuradora-Jerál Repúblika, Ana Pessoa, mós marka prezensa iha eventu ida ne’e.

Atu lee diskursu Primeiru-Ministru nian iha Konferénsia ne’e, klika iha ne’e.