Epizódiu foun hosi “Página do Governo” ne’ebé dedika ba Kombatentes Libertasaun Nasionál
Ministru Asuntus Kombatentes Libertasaun Nasionál, Gil da Costa Monteiro “Oan Soru”, ohin, loron 24 fulan-fevereiru tinan 2026, partisipa iha gravasaun ba epizódiu foun hosi programa televizivu “Página do Governo”, ne’ebé aborda kona-ba polítikas públikas ne’ebé dirije ba Kombatentes Libertasaun Nasionál. 
Entrevista ne’e foka kona-ba prioridade prinsipál sira Ministériu nian, liuliu iha área rejistu no atualizasaun baze-dadus Kombatentes Libertasaun Nasionál nian, fó pensaun no benefísiu sira ne’ebé prevee ona iha lei, no mós programa apoiu sosiál, saúde, edukasaun no inkluzaun sósiu-ekonómika ba veteranus no sira-nia família.
Durante gravasaun, ko’alia mós kona-ba tema sira ne’ebé relasiona ho prezervasaun no valorizasaun memória istórika luta libertasaun nasionál nian, inklui traballu investigasaun, arkivu no divulgasaun istórika, konstrusaun memoriál sira no realizasaun serimónia ofisiál sira rekoñesimentu públiku nian, ne’ebé iha koordenasaun ho entidade kompetente sira.
Ministru destaka mós knaar husi ninia Ministériu iha konsepsaun, ezekusaun, koordenasaun no avaliasaun ba polítika públika sira ne’ebé aprova ona husi Konsellu Ministrus ba setór ne’e, nune’e mós iha promosaun mekanizmus ba kolaborasaun ho órgaun Governu sira seluk kona-ba matéria sira ne’ebé iha ligasaun.
Programa “Página do Governo” promove husi Gabinete Portavós Governu, ne’ebé lidera husi Ministru Prezidénsia Konsellu Ministrus, Agio Pereira. Programa ne’e prodús iha parseria ho Rádiu no Televizaun Timor-Leste no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.
Programa ne’e konta ho Nélia Chaves nu’udar aprezentadora no ho Ika Moniz hanesan produtora ezekutiva. "Página do Governo" sai hanesan espasu ida ba diálogu institusionál, ne'ebé foka liu ba interese públiku nian, atu bele garante populasaun nia asesu ba asaun no desizaun prinsipál sira Ezekutivu nian.
Epizódiu ohin nian, hamutuk ho Ministru Asuntus Kombatentes Libertasaun Nasionál, sei tranzmite iha tempu badak nia laran iha RTTL no iha plataforma dijitál no rede sosiál sira Governu nian.
Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE
