Solidariedade Sosiál no Inkluzaun destaka iha gravasaun ba epizódiu foun husi programa “Página do Governo”
Ministra Solidariedade Sosiál no Inkluzaun, Verónica das Dores, partisipa ohin, loron 23 fulan-fevereiru tinan 2026, iha gravasaun ba epizódiu foun husi programa televizivu “Página do Governo”, ne’ebé aborda kona-ba polítikas públikas iha área seguransa sosiál, asisténsia sosiál no reinsersaun komunitária. 
Entrevista ne’e foka kona-ba prioridades setór nian iha ámbitu Governu Konstitusionál IX, inklui implementasaun programa apoiu ba família, protesaun ba grupu vulneravel, resposta sosiál iha situasaun emerjénsia no mekanizmus reinsersaun komunitária.
Durante gravasaun, ko’alia mós kona-ba tema sira ne’ebé relasiona ho reforsu sistema protesaun sosiál, koordenasaun institusionál ho entidade Estadu sira seluk no autoridade lokál sira, nune’e mós dezafiu no perspetiva sira iha futuru iha konsolidasaun polítikas públikas ne’ebé orienta ba inkluzaun sosiál.
Programa “Página do Governo” promove husi Gabinete Portavós Governu, ne’ebé lidera husi Ministru Prezidénsia Konsellu Ministrus, Agio Pereira. Programa ne’e prodús iha parseria ho Rádiu no Televizaun Timor-Leste no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.
Programa ne’e konta ho Nélia Chaves nu’udar aprezentadora no ho Ika Moniz hanesan produtora ezekutiva. "Página do Governo" sai hanesan espasu ida ba diálogu institusionál, ne'ebé foka liu ba interese públiku nian, atubele garante populasaun nia asesu ba asaun no desizaun prinsipál sira Ezekutivu nian.
Epizódiu ohin nian, hamutuk ho Ministra Solidariedade Sosiál no Inkluzaun, sei tranzmite iha tempu badak nia laran iha RTTL no iha plataforma dijitál no rede sosiál sira Governu nian.
Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE
