Governu Timor-Leste

Ministru Transportes no Komunikasoins, Miguel Marques Gonçalves Manetelu, iha loron 20 fulan-fevereiru tinan 2026, iha Embaixada Timor-Leste iha Tókiu, asina kontratu ida, ho TOA Corporation, empreza enjeñaria no konstrusaun Japaun nian ne’ebé espesializada iha obra marítima no portaria, ba konstrusaun Terminál Pasajeiru foun iha Aeroportu Internasionál Prezidente Nicolau Lobato, iha Dili. 

Serimónia ne’e hetan partisipasaun husi Embaixadora Timor-Leste iha Japaun, Maria Terezinha da Silva Viegas, nune’e mós reprezentantes husi empreza adjudikatária (manan-na’in) no ekipa konsultór projetu nian. 

Iha ninia diskursu, Ministru Miguel Marques Gonçalves Manetelu destaka katak edifísiu Terminál Pasajeiru ne’e hanesan komponente sentrál ida ba prosesu dezenvolvimentu no expansaun aeroportu nian, no mós katak projetu ne’e ezije padraun enjeñaria ne’ebé aas, rekizitus seguransa ne’ebé rigorozu, integra sistema aeroportuáriu no kumpre regulamentu aviasaun internasionál.

Nia subliña katak koordenasaun efetivu entre empreiteiru,  konsultór sira, enjeñeiru supervizór sira, autoridades aeroportuáriu no instituisaun governu relevante sira sei sai krusiál atu evita interrupsaun téknika, prevene atrazus no garante katak komponente hotu-hotu aliña ho planu mestre aeroportu nian. 

Ministru mós temi katak projetu ne’e nu’udar prioridade estratéjika nasionál ida, tanba sei reforsa konektividade, apoia turizmu, fasilita komérsiu no kontribui ba kreximentu ekonómiku.

Iha biban ne’e, nia hato’o apresiasaun Governu Timor-Leste nian ba Governu no povu Japaun, no mós ba Ajénsia Kooperasaun Internasionál Japaun (JICA) nian, ba sira-nia apoiu kontínuu ba setór infraestrutura, hodi afirma katak “maske serimónia ne’e ohin akontese iha-ne’e, ninia impaktu sei sente iha Timor-Leste tomak. Kontratu ne'ebé ita asina ona reprezenta la'ós de'it kompromisu legál ida, maibé vizaun hamutuk ida kona-ba progresu, modernizasaun no dezenvolvimentu ba tempu naruk ami-nia rain nian".

Embaixadora Maria Terezinha da Silva Viegas agradese ba entidades ne’ebé envolve ba serbisu maka’as  hodi realiza asinatura ne'e no husu ba empreza atu garante katak projetu ne'e remata tuir tempu no ho padraun kualidade ne'ebé aas.

Diretór TOA Corporation, Makoto, hateten katak terminál foun ne’e nu’udar infraestrutura ida ne’ebé prepara hela ba Simeira ASEAN 2029, ne’ebé Timor-Leste sei sai uma-na’in, no destaka papél aeroportu hanesan odamatan prinsipál nasaun nian. 

Diretór Senior Ezekutivu empreza, Katsuhisa Kimura, afirma: “Ami servisu ona iha Timor-Leste iha tinan hirak liubá no ami sente kontente no orgullu tanba hetan oportunidade atu servisu fila fali iha nasaun ne’e. Liuhusi ami-nia projetu anteriór sira, ami aprende ona buat barak kona-ba nasaun ida-ne’e no nia povu. Ami respeita tebes povu Timor nia reziliénsia o vontade di’ak.”

Nia hatutan tan katak empreza iha kompromisu atu ezekuta projetu ho responsabilidade, hodi fó prioridade ba seguransa, kualidade no kumpre prazu sira, iha koordenasaun besik ho kliente, konsultór sira no parseirus, no mós ho respeitu ba kultura lokál, ambiente no komunidade sira.

Konstrusaun Terminál Pasajeiru foun ne’e halo parte iha estratéjia nasionál hodi moderniza infraestrutura transporte no hametin konektividade aérea, ho objetivu atu apoia dezenvolvimentu sustentável no projesaun internasionál Timor-Leste nian.