Governu Timor-Leste

Ministru Negósiu Estranjeiru Zacarias Albano da Costa hala’o sorumutu bilaterál ho Delegasaun ida hosi Alemaña ne’ebé xefia hosi Xefe Divizaun Sudeste Asiátiku Ministériu Federál ba Kooperasaun Ekonomia no Dezenvolvimentu, Josef Füllenbach iha Salaun Nobre Ministériu Negósiu Estranjeiru, kuarta-feira, loron 16 fulan Marsu.

Ministru hateten katak, Timor-Leste hala’o parseria ho Nasaun barak, ida ne’e hanesan ba dala ualu ho governu Alemaña, iha sorumutu konsulta bilaterál sira ne’e hanesan polítika diálogu, ho Alemaña ne’ebé halo kuaze tinan-tinan hodi haree no halo avaliasaun ba projetu sira ne’ebé implementa iha Timor-Leste ne’e la’o diak ka lae.

“Iha sorumutu ne’e ko’alia kona-ba projetu integradu sira iha área barak mak hanesan empregu ba joven no prevensaun ba konflitus, ne’ebé involve Ministériu Agrikultura, Ministériu Ekonomia no Dezenvolvimentu no Ministériu Infra-estrutura. Projetu ne’ebé boot liu hotu iha Koperasaun Timor-Leste ho Alemaña mak projetu transporte Marítima”, ko’alia Ministru.

“Projetu iha setór transporte marítima nian ne’e hahú ho konstruksaun ró Berlin Nakroma mai ita no  sei involve mós konstruksaun ba fasilidade sira, apoiu tékniku ba formasaun no sei kria mós fatin manutensaun ba ró iha Tibar tanba Governu Alemaña mós sei ajuda Ró boot ida tan iha tempu badak mai Timor-Leste, maibé sira hakarak hosi Governu Timor-Leste atu bele kontribui ba fasilidade kosta sul Timor-Leste nian“, esplika Zacarias da Costa.

Iha sorumutu ne’e Governu Alemaña kompremete sei fó apoiu osan hamutuk euro rihun atus ha’at (€400.000) no osan ida ne’e sei uza hodi harii fasilidade iha kosta sul no mós iha Tibar hodi halo Manutensaun ba ró sira.