Governu Timor-Leste

Iha loron 6 no 12 fulan-fevereiru tinan 2026, Governu Konstitusionál IX lansa obras  konstrusaun ba Merkadu Munisipál foun Ermera no Baukau nian, ida-idak, iha inisiativa ida hosi Ministériu Komérsiu no Indústria. Serimónias ne’e prezide husi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, ne’ebé reprezenta Primeiru-Ministru, Kay Rala Xanana Gusmão. 

Iha Ermera, projetu ne’e nu’udar investimentu ida maizumenus dolar amerikanu millaun 8,9, ho konkluzaun ne’ebé marka ona ba tinan 2027. Infraestrutura foun ne’e hakarak hadi’a kondisaun fa’an nian, fasilita distribuisaun produtus agríkolas hosi área rurál sira, no hametin ligasaun entre produtór no konsumidór sira.

Iha nia intervensaun, Vise-Primeiru-Ministru hateten: “Merkadu ida-ne’e pertense ba povu Ermera. Importante tebes atu ita servisu hamutuk, la haree ba diferensa polítika  ka partidu, hodi tau hamutuk esforsus ba bein-komún no ba progresu munisípiu ne’e nian”. Governante ne’e mós husu kolaborasaun populasaun nian atu serbisu ne’e bele hala’o sein impedimentu no tuir prazu ne’ebé estabelese ona.

Ministru Komérsiu no Indústria, Nino Pereira, deklara katak "merkadu foun ne’e nu’udar oportunidade ida hodi hametin ekonomia lokál, ne'ebé sai baze ba progresu no dezenvolvimentu ekonómiku nasionál", ho subliña nesesidade ba infraestrutura ne’ebé adekuadu atu dinamiza komérsiu no valoriza produsaun nasionál.

Prezidente Autoridade Munisípiu Ermera, José Martinho dos Santos Soares, husu komunidade atu apoia projetu ne’e, hodi hateten katak merkadu munisipál tenke sai infraestrutura ne’ebé tuir padraun kualidade iha nivel nasionál no internasionál.

Iha Baucau, lansamentu obra ne’e iha loron 12 fulan-fevereiru, ho investimentu ida maizumenus dolar amerikanu millaun 7,1 no konkluzaun ne’ebé marka ona ba fulan-novembru tinan 2027. Merkadu foun ne’e ho objetivu atu asegura espasu ida ne’ebé dignu no organizadu ba vendedór sira no promove atividade ekonómika munisípiu nian.

Durante serimónia ne’e, Vise-Primeiru-Ministru afirma katak “kompromisu Governu nian mak atu harii espasu ida ne’ebé dignu ba ita-nia povu, liuliu ba vendedór sira, atu nune’e sira bele dezenvolve sira-nia atividade, tanba dezenvolvimentu ekonómiku hahú husi povu”. Governante ne’e mós husu kooperasaun husi parte hotu-hotu — partidus polítikus, veteranus, autoridade suku no aldeia sira — hodi garante kualidade obra no kumprimentu ba prazu ne’ebé determina ona.

Ministru Komérsiu no Indústria nian destaka katak merkadu foun ne’e nu’udar "oportunidade di'ak ida ba komunidade Baucau nian hodi dezenvolve sira-nia negósius iha futuru", hodi hatutan katak infraestrutura ne’e sei fasilita atividade hosi komersiantes no promove produtu lokál sira.

Presidente Autoridade Munisipiu Baucau, Veneranda Lemos, hatete katak data ne’e marka momentu foun ida ba munisípiu, ho inísiu konstrusaun infraestrutura ida ne'ebé sei fó kondisaun di'ak-liu ba vendedór sira hodi hala'o sira-nia atividade.

Projetu rua ne'e halo parte iha planu Ministériu Komérsiu no Indústria nian ba konstrusaun no rekualifikasaun merkadu munisipál sira iha parte oioin país nian, ho objetivu atu hametin infraestruturas komersiais no apoia dezenvolvimentu ekonómiku lokál. Lansamentu Merkadu Munisípiu Lautein ne’e mós planeia ona ba final fulan-fevereiru no projetu ba merkadu foun sira iha Maliana, Ainaru, Suai, no Vikeke iha hela faze preparasaun téknika.