“Página do Governo” filafali gravasaun liuhusi entrevista hamutuk ho Ministru Nelyo Isaac Sarmento
Programa Página do Governo filafali mai iha tinan 2026 ne’e, kontinua halo gravasaun ba série foun etrevista hamutuk ho membrus Governu Konstitusionál IX, hafoin halo ona tranzmisaun edisaun 16 durante tinan 2025.
Programa dahuluk iha série foun ida-ne'e, korresponde ba epizódiu 17, ne’ebé grava ohin, loron 5 fulan-fevereiru tinan 2026, no hetan partisipasaun hosi Ministru Juventude, Desportu, Arte no Kultura, Nelyo Isaac Sarmento. Entrevista ne’e foka liu kona-ba liña asaun prinsipál, prioridade polítika no dezafiu sira iha área juventude, desportu, arte no kultura, nune’e mós impaktu polítika públika iha setór hirak ne’e iha dezenvolvimentu sosiál no umanu país nian.
Nu'udar responsavel ba konsesaun, ezekusaun, koordenasaun no avaliasaun polítika nasionál iha área sira-ne'e, Ministru Juventude, Desportu, Arte no Kultura, iha responsabilidade hodi promove partisipasaun ativa juventude nian, dezenvolve desportu no kompetisaun nivel aas, valoriza arte no kultura, prezerva patrimóniu istóriku-kulturál, promove indústria kriativa, hamutuk ho entidade Estadu no organizasaun sosiedade sivíl sira seluk.
Promove husi Gabinete Porta-Voz Governu, ne’ebé lidera husi Ministru Prezidénsia Konsellu Ministrus, Agio Pereira, programa “Página do Governo” ne’e, halo produsaun iha parseria ho Rádiu no Televizaun Timor-Leste no mídia nasionál sira, ho objetivu atu reforsa transparénsia governativa, prestasaun kontas no asesu populasaun ba informasaun kona-ba desizaun no polítika prinsipál Ezekutivu nian.
Aprezenta husi Nélia Chaves no ho Ika Moniz hanesan produtora ezekutiva, “Página do Governo” hatuur ninia-an hanesan espasu diálogu institusionál ida, ho linguajen klara no asesivel, no foka liu ba interese públiku.
Iha tempu badak sei tranzmite epizódiu 17 ne’e iha RTTL, no iha plataforma dijitál no rede sosiál Governu nian. Programa hotu-hotu ne’ebé tranzmite ona, disponivel iha kanál YouTube @PCMPAGINADOGOVERNOTIMORLESTE.
Iha loron tuirmai, loron 6 fulan-fevereiru, sei grava mós programa ba epizódiu 18, ne’ebé sei hetan partisipasaun husi Ministra Edukasaun, Dulce de Jesus Soares, hodi fó kontinuasaun ba série foun entrevista ho membru Governu sira.
