Vise-Primeiru-Ministru entrega apoiu inkubasaun negósiu ba empreza mikro no ki’ik 24
Iha loron 30 fulan-janeiru tinan 2026, Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, prezide serimónia entrega pakote apoiu ba tinan 2025 iha ámbitu Programa “Fasilidade Inkubasaun Negósiu” (FIN), ho objetivu atu apoia negósiu mikro no ki’ik foun sira iha setór oioin. Inisiativa ne’e kobre benefisiáriu na’in-24, feto na’in-6 no mane na’in-18. 
Durante serimónia ne’e, Diretór Ezekutivu IADE, Filomeno Marcelino Belo, esplika katak benefisiáriu sira hili liuhosi prosesu tékniku tuir faze, ne’ebé inklui submisaun no avaliasaun ba proposta, akonsellamentu tékniku, preparasaun ba planu negósiu sira no desizaun finál hosi konsellu administrasaun Institutu nian. Nia mós temi katak, hosi totál proposta planu negósiu 70 ne’ebé simu, 24 hetan aprovasaun ba apoiu iha ámbitu programa FIN ne’e.
Tuir nia, pakote apoiu sira ne’e inklui verbas ne’ebé aloka ba kustu operasionál, akizisaun matéria-prima, komersializasaun no investimentu iha ekipamentu, depende ba nesesidade ne’ebé identifika iha kada planu negósiu. IADE sei fó apoiu ba benefisiáriu sira durante períodu tinan rua, hodi fó konsellu tékniku no monitoriza ezekusaun projetus, bazeia ba relatóriu periódiku ne’ebé aprezenta hosi emprezáriu sira.
Reprezenta benefisiáriu sira, Ferdinandus da Costa, emprezáriu ida iha setór agríkola munisípiu Lautein nian, hato’o nia agradesimentu ba apoiu ne’ebé fó no destaka impaktu hosi finansiamentu iha modernizasaun no inovasaun hosi ninia atividade ekonómika sira. Nia subliña importánsia kontinuidade hosi programa ne’e no reforsu asesu ba instrumentu kréditu ne’ebé adekuadu ba emprendedór ki’ik sira.
Vise-Primeiru-Ministru hateten katak, governu halo hela esforsu atu kria Banku Nasionál Dezenvolvimentu Timor-Leste, ho objetivu atu hadi’a asesu ba kréditu no promove kreximentu ekonómiku inkluzivu. Nia mós destaka IADE nia papél hodi apoia empreendedorizmu nasionál, liuhosi programa sira ne'ebé orienta ba viabilidade, inovasaun no sustentabilidade negósius.
Programa “Fasilidade Inkubasaun Negósiu” halo parte iha Planu Asaun Anuál IADE nian no ho objetivu atu reforsa setór privadu, promove kriasaun produtu no servisu foun sira, no mós kontribui ba diversifikasaun ekonomia nasionál. To’o tinan 2025 nia rohan, IADE apoia ona benefisiáriu hamutuk 244 iha Timor-Leste laran tomak.
Serimónia ne’e hetan mós partisipasaun hosi reprezentantes instituisaun públika oioin ne’ebé iha ligasaun ho dezenvolvimentu ekonómiku no formasaun profisionál.
