Timor-Leste partisipa iha Retiru Ministrus Negósius Estranjeirus ASEAN
Ministru Negósius Estranjeirus no Kooperasaun, Bendito dos Santos Freitas, partisipa iha Retiru Ministrus Negósius Estranjeirus ASEAN (AMM Retreat), ne’ebé hala’o iha loron 28 no 29 fulan-janeiru tinan 2026, iha Cebu, ne’ebé prezide hosi Ministra Negósius Estranjeirus Filipinas, país ne’ebé asume Prezidénsia ASEAN iha tinan 2026. 
Sorumutu ne'e nu’udar sorumutu ministeriál altu nivel dahuluk iha ámbitu pilár Komunidade Polítika-Seguransa ASEAN durante Prezidénsia Filipinas nian, ho tema "Hakat ba Ita-nia Futuru Hamutuk". Ministru sira ne’e analiza prioridades organizasaun nian no troka opiniaun kona-ba dezenvolvimentu rejionál no internasionál, ho foku ba promosaun dame, estabilidade no prosperidade iha rejiaun Sudeste Aziátiku.
Durante retiru, Ministru sira reafirma kompromisu ba papél sentrál ASEAN nian, multilateralizmu no respeitu ba lei internasionál, inklui rezolusaun pasífika ba disputa sira. Nune’e mós ko’alia kona-ba tema rejionál relevantes, liuliu situasaun iha Myanmar, kooperasaun marítima no seguransa rejionál, tuir desizaun Simeira ASEAN ba da-47.
Durante sorumutu ne’e, Ministru Bendito dos Santos Freitas, hala’o sorumutu bilaterál ho Vise-Primeiru-Ministru no Ministru Negósius Estranjeirus no Kooperasaun Internasionál Kamboja, Prak Sokhonn, no ho Ministru Negósius Estranjeirus Vietname, Lê Hoài Trung. Sorumutu sira ne’e reafirma kompromisu hodi hametin kooperasaun bilaterál no koordenasaun iha ámbitu ASEAN, inklui akompañamentu ba mekanizmu kooperasaun polítika no institusionál.
Ministru hetan akompañamentu husi Vise-Ministra ba Asuntus ASEAN, Milena Rangel no hosi Diretora-Jerál ba Asuntus ASEAN, Elisa da Silva.
