Governu Timor-Leste

Primeiru-Ministru Kay Rala Xanana Gusmão inaugura edifísiu tratamentu tuberkuloze Dr. Daniel John Murphy, iha Sábadu, loron 31 fulan-janeiru 2026, iha Dili. Edifísiu ne'e, pertense ba Fundasaun Klínika Bairru Pité Lanud (FCBPL, sigla iha lian portugés), hetan finansiamentu liuhosi subvensaun públika Gabinete Apoiu ba Sosiedade Sivíl (GASC, akrónimu iha lian Portugés), iha tutela Ministériu Koordenadór Asuntus Sosiais. 

Infraestrutura foun ne'e ho objetivu atu reforsa kondisaun kuidadu saúde nian iha tratamentu tuberkuloze, ne’ebé kontribui hodi hadi'a kualidade atendimentu ba pasiente sira no reforsa resposta nasionál ba moras ida-ne’e.

Iha serimónia ne'e, Primeiru-Ministru destaka dedikasaun hosi matebian Doutór Daniel John Murphy, ne'ebé dedika an iha tinan barak nia laran hodi harii no hala’o Klínika Bairru Pité ne’e, no mós kompromisu kontínuu hosi profisionál saúde sira ne'ebé sakrifika sira-nia an loroloron hodi tau matan ba pasiente sira, maski la simu osan.

Primeiru-Ministru mós hato’o apresiasaun ba serbisu ne’ebé Klínika Bairru Pité hala’o, iha kampaña prevensaun HIV/SIDA no iha área sira seluk saúde públika nian.

Prezidente Fundasaun Klínika Bairru Pité, Inácio dos Santos, hateten katak konstrusaun edifísiu ne’e sai posivel tanba apoiu husi Primeiru-Ministru, no Vise-Primeiru-Ministru ba Asuntus Sosiais, Mariano Assanami Sabino, no Koordenadór GASC, Joaquim Soares Freitas, liuhosi subvensaun ida ho montante dolar amerikanu rihun 146,7, ho taxa ezekusaun 98,91%.

Tuir Fundasaun, edifísiu foun ne’e hanesan pasu importante ida iha reforsu infraestrutura saúde Klínika Bairru Pité Lanud nian, ne’ebé permite hodi hadi'a tratamentu ba pasiente tuberkuloze no apoia esforsu nasionál atu halakon moras ne'e iha Timor-Leste.

Tuberkuloze nafatin sai dezafiu boot ba saúde públika iha nasaun ne'e. Tuir Relatóriu Globál Tuberkuloze 2024, Timor-Leste iha taxa insidénsia ida ne'ebé aas liu iha rejiaun Sudeste Aziátiku. Maski iha progresu ne'ebé halo iha tinan hirak ikus ne'e, ho mortalidade ne'ebé redús no aumentu iha taxa susesu tratamentu nian, moras ne'e mantein iha taxa transmisaun komunitária ida ne'ebé aas.

Fundasaun Klínika Bairru Pité Lanud, hanesan parseira ida hosi Ministériu Saúde maizumenus durante dékada rua, hala'o ona knaar relevante ida iha detesaun no tratamentu tuberkuloze, hahú hosi tinan 2010, kontribui ona, halo tratamentu ba pasiente liu rihun ualu, aleinde fó tratamentu iha área sira seluk hanesan HIV, onkolojia, kuidadu saúde inan nian, kuidadu dentáriu no konsultas ambulatórias.

Prezidente Fundasaun ne’e reafirma nia kompromisu atu utiliza edifísiu foun ne’e hodi reforsa prestasaun kuidadu primáriu iha tratamentu tuberkuloze, aumenta detesaun kazu no hamenus transferénsia ne’ebé la nesesáriu ba Hospital Nacional Guido Valadares.

Serimónia ne’e konklui ho agradesimentu ba Governu Konstitusionál IX no entidade hotu-hotu ne’ebé apoia konkretizasaun projetu ne’e, nune’e mós omenajen ida ba Dr. Daniel John Murphy ba ninia legadu iha área saúde iha Timor-Leste.