Governu Timor-Leste

Iha segunda-feira ne’e, loron 26 fulan-janeiru, Governu lansa projetus reabilitasaun estrada urbana Glenu no estrada ne’ebé liga Glenu ba Postu Administrativu Letefoho, iha serimónia ida ne’ebé realiza iha Eskola Bázika Sentrál Eraulu, munisípiu Ermera, prezide hosi Primeiru-Ministru, Kay Rala Xanana Gusmão, akompaña hosi Ministru Obras Públikas, Samuel Marçal. 

Iha ninia diskursu, Primeiru-Ministru apela ba populasaun Ermera, liuliu iha área Glenu no Letefoho, atu labele kria obstákulu ba ezekusaun obras ne’e, nune’e bele permite atu serbisu ne’e la’o tuir prazu ne’ebé Governu define ona. Nia subliña katak, estrada sira ne’e harii ba benefísiu diretu ba komunidade sira no kolaborasaun husi populasaun sira maka importante tebetebes atu projetus ne’e hotu lalais.

Kay Rala Xanana Gusmão rekorda katak, dezde aprovasaun Planu Estratéjiku Dezenvolvimentu Nasionál tinan 2011-2030, infraestruturas rodoviárias sai ona prioridade ida ba dezenvolvimentu país nian, hodi garante asesu ba edukasaun, saúde no atividade ekonómika no mós atividade sosiál sira seluk. Nia mós hato’o satisfasaun ba partisipasaun populasaun nian iha eventu ne’e no hato’o nia espetativa katak obras ne’e sei termina iha tinan 2027.

Durante serimónia ne’e, Primeiru-Ministru rekomenda ba Ministériu Obras Públikas atu konsidera, iha planeamentu futuru, reabilitasaun estrada ne’ebé liga ba Aiseo, haree ba ninia valór istóriku iha kontestu rezisténsia nasionál.

Ministru Obras Públikas, Samuel Marçal, esplika katak, projetus ne’e nu’udar rezultadu hosi prosesu ida ne’ebé inklui estudu tékniku, dezeñu, kumprimentu ba rekizitu legál sira no prosedimentu aprovizionamentu nian, atu nune’e bele garante kualidade no durabilidade infraestruturas. Nia subliña katak, maske iha presaun atu aselera obras ne’e, Governu avansa ho rigór no responsabilidade, hodi respeita lei no kompromisu sira ne’ebé asume ona ba parseirus dezenvolvimentu.

Ministru mós husu pasiénsia husi komunidade sira, hodi esplika katak prosesu indemnizasaun no rekolla dadus presiza tempu, no agradese ba populasaun Ermera nia komprensaun. Nia repete mós pedidu atu la bele halo impedimentu ba obra sira, inklui destruisaun ba ekipamentu ka materiál sira, no atu sira ne'ebé iha interese ba oportunidade serbisu ne’e komunika diretamente ho empreza sira ne'ebé responsavel.

Informa mós katak Governu prepara hela atu asina kontratu sira iha tempu badak no lansa projetu reabilitasaun ba estrada Letefoho-Atsabe no Atsabe-Lourba, iha munisípiu Bobonaru, ne’ebé oras ne’e iha hela faze avaliasaun finál.

Prezidente Autoridade Munisipál Ermera, José Martinho dos Santos, agradese ba esforsu hamutuk husi instituisaun sira ne’ebé envolve, ne’ebé permite konkretizasaun lansamentu no asinatura ba kontratus ne’e, hodi destaka benefísiu diretu husi infraestrutura sira-ne’e ba populasaun munisípiu nian.

Projetu ba konstrusaun Estrada Urbana Glenu no ninia sistema drenajen iha orsamentu dolar amerikanu millaun 3,2 resin no durasaun ne’ebé prevee ba tinan ida. Seksaun husi Glenu to’o Letefoho, ho 84 km resin, iha orsamentu dolar amerikanu millaun 38 resin no prevee durasaun sei termina iha loron 365.

Projetus ne’e sei fó benefísiu ba abitante maizumenus rihun 54 hosi postu administrativu haat munisípiu Ermera nian.

Serimónia ne’e inklui asinatura kontratus no konta ho prezensa hosi membrus Governu, Parlamentu Nasionál, autoridades munisipais no lokais, reprezentantes Igreja Katólika, forsas seguransa no públiku ein-jerál, hodi reafirma kompromisu ba jestaun ne’ebé di’ak hosi rekursus públikus.