Governu Timor-Leste

Ministru Agrikultura, Peskas, Pekuária no Florestas, Marcos da Cruz, hala’o atividade lubuk ida iha semana ikus nia laran iha munisípiu Baucau no Aileu, foka ba hametin infraestruturas irrigasaun no entrega ekipamentus agríkolas, ho objetivu atu hasa’e produsaun no produtividade agríkola. 

Iha loron 19 fulan-janeiru, iha Baukau, Ministru  inaugura  sistema irrigasaun Uai-Dasu, ne’ebé lokaliza iha Suku Uma-Ana Iku, Postu Administrativu Venilale. Infraestrutura ne’e fornese bee maizumenus ba natar ektare 50 iha área Berkoli no Fatumaka, hodi kontribui ba melloramentu kondisoins  produsaun agríkola lokál. Durante serimónia ne’e, governante ne’e subliña katak projetu ne’e haree ba nesesidades konkretas komunidades agríkolas nian no halo parte iha estratéjia dezenvolvimentu ne’ebé ekilibradu ba setór ne’e.

Nune’e mós iha Baucau, iha loron ne’ebé hanesan, Ministru entrega ekipamentus agríkolas modernus hamutuk unidade 19 ba Autoridade Munisipál, ho intensaun atu apoia grupu agrikultór lokál sira. Ekipamentu hirak-ne’e inklui tratór sira, mákinas kuda fini no kolleita, ho objetivu atu hametin mekanizasaun agríkola no hamenus servisu manuál iha atividades agríkolas. Temi mós katak Ministériu iha ekipas mekanizasaun móveis  ba apoiu tékniku no manutensaun ekipamentus iha territóriu laran tomak.

Iha loron 22 fulan-janeiru, iha Aileu, Ministru Agrikultura entrega ekipamentus agríkolas foun ba Autoridade Munisipál, iha ámbitu husi prosesu modernizasaun ba setór agríkola. Inisiativa ne’e halo parte iha polítika governamentál hodi promove auto-sufisiénsia ai-han liuhosi hasa’e área kultivu, hadi’a produtividade no hamenus dependénsia ba importasoins.

Atividades  ne’e hetan  partisipasaun husi autoridade munisipál sira, reprezentantes servisus Estadu nian, lider komunitáriu no agrikultór sira, hodi hametin koordenasaun entre Governu, estrutura lokál sira no komunidades benefisiárias  iha implementasaun polítikas públikas ba setór agríkola.