SEPI reforsa importánsia ba Igualdade Jéneru iha Ministériu sira
Sekretaria Estadu Promosaun Igualdade (SEPI) organiza, iha semana liu ba, semináriu ida ho objetivu atu haree progresu hosi implementasaun no abordazen kona-ba integrasaun jéneru nian iha instituisaun relevante sira ne´ebé asina Deklarasaun Díli iha fulan Marsu tinan 2008.
Sekretaria Estadu Promosaun Igualdade servisu hamutuk ho Ministériu relevante sira atu fó importánsia ba implementasaun Díli kompromisu. SEPI apela ba Diretór Jeral no Diretór Nasionál sira atu hola parte mós iha prosesu implementasaun iha ministériu ida-idak no integrasaun jéneru, tanba responsabilidade ne’e kompete ba ministériu ida-idak.
“Ita boot sira tenke prepara an atu intende didi’ak polítika ba área igualidade jéneru ne’ebé ita bolu Gender Ministery Police, tanba Timor-Leste mós sei sai membru CEDAW iha tinan ha’at oin mai”, hatutan Idelta Rodrigues.
Iha fatin hanesan Diretór Jerál Ministériu Agrikultura no Peska (MAP), Lourenço B. Fontes, iha ninia intervensaun hateten katak “Feto nia involvimentu signifikante tebes, tan ne’e MAP fó nafatin atensaun ba igualidade jéneru iha prosesu dezenvolvimentu agrikultura nian. MAP mós liu hosi funsionáriu tékniku sira iha terrenu fó nafatin formasaun ba grupu agrikultór feto no mane.”
Diretór Jerál Interinu Sekretaria Estadu Formasaun Profisionál no Empregu (SEFOPE), Jacinto Barros Gusmão aproveita oportunidade hodi informa katak “Progresu ne’ebé mak SEFOPE halo kona-ba promosaun igualidade jéneru reflete sasukat rua: ida mak ita bele haree hosi parte kualitativu, feto mós okupa ona iha kargu xefia (xefe departamentu) no ida seluk mak kuantidade, refere liu ba númeru formasaun nian ne’ebé halao tiha ona.
