Governu Timor-Leste

Iha semana kotuk, Sekretaria Estadu Komunikasaun Sosiál (SEKOMS) hala’o Media Tour 2026, iha Bali, Indonézia. Inisiativa ida ne’e promove vizita traballu no interkámbiu ho mídia estranjeiru sira, ho objetivu atu hametin kapasidade profisionál mídia nasionál sira nian. 

Inisiativa ne’e inklui partisipasaun hosi mídia nasionál sanulu no halo parte iha estratéjia hosi Programa Governu Konstitusionál IX nian hodi fornese oportunidade aprendizajen no troka esperiénsia ho mídia estranjeiru sira, liuliu haree ba dezafiu sira ne’ebé hamosu hosi konverjénsia mídia no transformasaun dijitál.

Hanesan parte ida hosi programa ne’e, Sekretáriu Estadu Komunikasaun Sosiál, Expedito Loro Dias Ximenes, hateten katak Media Tour 2026 ho objetivu atu aumenta esperiénsia jornalista timoroan sira nian liuhosi observasaun direta ba prátika jestaun mídia nian iha Bali, ho énfaze ba estratéjia adaptasaun ne’ebé nesesáriu atu garante sustentabilidade, kredibilidade no relevánsia iha kontestu mídia globál ne’ebé muda beibeik.

Governante ne’e mós subliña katak inisiativa ne’e nu’udar instrumentu ida ba diplomasia mídia nian, hodi kria oportunidade ba kooperasaun profisionál iha rai-li’ur, iha kontestu ida ne’ebé marka ho aumentu dezinformasaun (informasaun falsu), polarizasaun ba espasu informasaun nian no diminuisaun konfiansa públika iha órgauns komunikasaun sosiál.

Iha vizita ne’e, jornalista nasionál sira simu hosi responsavel sira husi Radio Republik Indonesia (RRI) Denpasar no sira vizita mós Bali Post, iha ne’ebé sira haree kona-ba prátika jestaun redasaun, organizasaun emprezariál no estratéjia dezenvolvimentu konteúdu iha era dijitál.

Jornalistas husi mídia sira tuirmai partisipa iha Media Tour 2026 maka: Jornal Independente, Timor Post, STL, Tatoli, IP, RTTL, EP, SMNews, GMN TV, VIP TV, Dili Post no SapNews.