Lista naran Mártir no Antigu Kombatente sira ba Libertasaun Nasionál sei públika iha fulan Marsu nia laran
Ministériu Solidariedade Sosiál, liu hosi Sekretaria Estadu Asuntu Antigu Kombatente Libertasaun Nasionál (SEAAKLN), sei fó sai ba públiku kona-ba lista naran Kombatente Libertasaun Nasionál no sei taka iha distritu no sub-distritu hotu hahú iha loron 15 fulan Marsu 2011.
“Komisaun Eventuál halo ona verifikasaun no komposizaun ba dadus, ne’ebé hahú ona hosi sub-distritu to’o iha distritu. Oras ne’e dadaun dadus sira ne’e hetan ona aprovasaun, ekipa eventuál sei ba taka lista Mártir no Antigu Kombatente sira ba Libertasaun Nasionál iha ida-idak nia sub-distritu.”, hateten Sekretáriu Estadu ba Asuntu Antigu Kombatente Libertasaun Nasionál, Mário Nicolau dos Reis, iha konferénsia ba imprensa ne’ebé hala’o foin lalais.
Kona-ba pensaun ne’ebé fo sai iha lista editál tinan 2008 no 2009, tuir alterasaun Dekretu-Lei n.º 15/2008, 4 Juñu, kona-ba estatutu Kombatente Libertasaun Nasionál nian, sei hala’o pagamentu retroativu hahú iha tinan 2010. Pagamentu retroativu ne’e, sei fó tuir desizaun Parlamentu Nasionál nian foin lalais ne’e, ne’ebé aloka ona orsamentu ba benefisiáriu sira ne’ebé lakon direitu ba pensaun no sei hetan fali direitu retroativu iha tinan 2011, hatutan Sekretáriu Estadu.
