Governu inaugura eskola bázika iha Ermera no lansa projetu edukasaun infánsia iha Baucau
Iha loron 16 fulan-janeiru tinan 2026, Governu inaugura Eskola Bázika Sentrál (EBS) 1, 2 no 3 hosi Ducurai, iha Postu Administrativu Letefoho, munisípiu Ermera, no iha loron hanesan lansa projetu edukasaun infánsia ida iha munisípiu Baucau, nu’udar parte ida hosi reforsu asesu ba edukasaun bázika no pré-eskolár. 
Serimónia iha Ermera ne’e prezide husi Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, hamutuk ho Vise-Ministru Administrasaun Estatál, Jacinto Rigoberto, no Prezidente Autoridade Munisipál Ermera, José Martinho dos Santos Soares.
Iha okaziaun ne'e, destaka importánsia hosi eskola hanesan espasu aprendizajen nian ida ne’ebé serbí labarik sira iha komunidade no nasaun, ho apela ba kolaborasaun hosi famílias, profesór sira, estudantes no komunidade lokál iha prezervasaun infraestrutura eskolár nian sira.
Eskola EBS 1, 2 no 3 iha Ducurai halo parte iha Programa Dezenvolvimentu Integradu Munisipál Munisípiu Ermera nian ba tinan 2025. Obra ne’e hala’o hosi empreza lokál sira, ho totál investimentu liu dolar amerikanu rihun 196, ne’ebé fó benefísiu ba estudante maizumenus 400. Serimónia ne’e hetan partisipasaun hosi autoridade lokál sira, forsas seguransa, profesór sira, estudantes no enkarregadu edukasaun sira.
Nune’e mós iha loron 16 fulan-janeiru, Ministra Edukasaun, Dulce de Jesus Soares, partisipa iha lansamentu projetu edukasaun infánsia ida iha suku Bucoli, Postu Administrativu Baucau-Vila, munisípiu Baucau, hamutuk ho Prezidente Autoridade Munisipál Baucau, Veneranda Lemos, no parseiru dezenvolvimentu sira.
Projetu tinan lima ne’e, ho objetivu atu implementa programa edukasaun pré-eskolár iha suku 29, ne’ebé kobre sentru 15 iha munisípiu Baucau no 14 iha munisípiu Bobonaru, ho objetivu atu habelar asesu ba edukasaun pré-eskolár ba labarik ho idade tinan 3 to’o tinan 5. Inisiativa ne’e hetan apoiu hosi KOICA no implementa hosi UNICEF, iha koordenasaun ho Ministériu Edukasaun no autoridade lokál sira.
Hanesan parte husi intervensaun ida-ne’e, formaliza mós entrega rai ida ba Ministériu Edukasaun, ne’ebé sei utiliza ba konstrusaun infraestrutura ensinu pre-eskolár nian.
