Governu Timor-Leste

Iha loron 17 fulan-janeiru tinan 2026, Ministru Negósius Estranjeirus no Kooperasaun Timor-Leste, Bendito dos Santos Freitas, hasoru malu ho Ministru Estadu no Negósius Estranjeirus Portugál, Paulo Rangel, iha Lizboa, hodi analiza reforsu kooperasaun bilaterál no aprofunda diálogu polítiku kona-ba asuntu interese komún nian iha ámbitu Komunidade País Lian Portugés (CPLP, sigla iha lian portugés). 

Sorumutu ne’e foka liuliu ba situasaun polítiku-demokrátiku no konstitusionál iha Giné-Bissau, hodi troka opiniaun kona-ba inisiativas polítikas no diplomátikas ne’ebé bele kontribui ba solusaun pasífika tuir orden konstitusionál, inklui posivel mobilizasaun ba esforsu rejionál no multilaterál iha ámbitu (CPLP). 

Partidu sira reafirma pozisaun CPLP nian hodi defende orden konstitusionál, rejeita kualkér forma lejitimasaun golpe Estadu no husu liberta ema sira ne’ebé hetan detensaun tanba krize polítika, hanesan kondisaun hodi fila-fali ba normalidade demokrátika.

Ko’alia mós kona-ba atividade sira ne’ebé relasiona ho Prezidénsia pro tempore Timor-Leste nian iha CPLP, nune’e mós preparasaun ba komemorasaun aniversáriu organizasaun nian ba da-30, inklui inisiativa sira ne’ebé ho objetivu atu hametin diálogu no kooperasaun entre Estadus-Membrus.