Governu Timor-Leste

Ró-biblioteka internasionál Doulos Hope, opera hosi organizasaun umanitária GBA Ships (Gute Bücher für Alle - Livru di’ak ba ema Hotu), ohin, loron 15 fulan-janeiru 2026, to’o iha Portu Dili, hodi marka vizita dahuluk hosi ró ida-ne’e mai Timor-Leste. Ró ne'e sei hela iha país ne'e to'o loron 29 fulan-janeiru. 

Entre loron 16 no 28 fulan-janeiru, Doulos Hope loke ba públiku ho hala’o feira internasionál livru nian ida iha ró laran, iha Portu Dili, hodi fó asesu ba livru sira no promove ábitu leitura iha populasaun nia leet, liuliu labarik no joven sira.

Maski ida-ne'e hanesan vizita ba dahuluk hosi Doulos Hope mai Timor-Leste, país ne'e simu ona ró GBA Ships ida seluk, ne'ebé iha momentu ne'ebá koñesidu ho naran MV Doulos, durante para iha Dili iha fulan-novembru tinan 2008. Iha okaziaun ne’ebá, Primeiru-Ministru, Kay Rala Xanana Gusmão, destaka misaun ró-livraria ba komunidade sira, hodi hateten: “Ami rekoñese ita-boot sira-nia misaun dame no domin nian. Ita koko atu harii país, Estadu no povu. Labarik sira tenke kompriende ita-boot sira-nia misaun, tanba ita moris iha mundu ida ne’ebé presiza dame.”

Doulos Hope hanesan biblioteka no livraria namlele ida ne'ebé halo viajen ba portu sira iha nasaun oioin, liuliu iha Ázia, hodi lori livrus no promove atividade edukativa no kulturál sira. Molok ne’e kria hanesan ró kruzeiru ida, maibé iha tinan 2023 adapta ba objetivu ida-ne'e no iha tripulasaun internasionál ida hosi voluntáriu sira.

Durante nia permanénsia iha Dili, feira livru ne’e disponibiliza livru rihun 5 resin, inklui literatura infantíl, livru edukativu, obra inspirasaun kristaun no livru divulgasaun jerál. Inisiativa ne'e atu promove mós kontaktu interkulturál entre tripulasaun no komunidade lokál.

Feira ne'e loke hosi loron Tersa to'o Sábadu, hosi tuku 10:00 dadeer to'o tuku 5:30 lokraik, no iha loron-domingu hosi tuku 1:00 lokraik to'o tuku 7:00 kalan. Ró ne'e taka ba públiku iha loron-segunda sira tanba manutensaun. Iha loron abertura, 16 fulan-janeiru, oras maka hosi tuku 1:00 lokraik to'o tuku 5:30 lokraik. Tama ba ró laran vizitante ida sei selu sentavu 20, gratuita ba vizitante sira ho idade menus hosi tinan 18 no liu hosi tinan 65.