Governu Timor-Leste

Iha loron 9 to’o 10 fulan-janeiru tinan 2026, Primeiru-Ministru, Kay Rala Xanana Gusmão, inaugura projetu sistema irrigasaun rua iha Laivai, munisípiu Lautein no Galata iha munisípiu Baukau, nune’e mós reabilitasaun estrada Karavela-Kaisidu-Aeroportu Baukau, iha ámbitu investimentu infraestruturas atu apoia produsaun agríkola no mobilidade lokál. 

Iha Laivai, sistema irrigasaun ne’ebé inaugura iha loron 9 fulan-janeiru sei fornese bee ba natar ektare 500 iha suku Ililai no Eukisi, iha Postu Administrativu Lautein. Projetu ne’e integra polítika Governu Konstitusionál IX nian ne’ebé ho objetivu atu moderniza agrikultura no hasa’e produsaun foos nasionál.

Durante serimónia ne’e, Primeiru-Ministru salienta importánsia husi obra ne’e atu hasa’e produsaun ai-han no hamenus importasaun foos no mós apela ba agrikultór sira atu asegura utilizasaun no manutensaun sistema ne’e ho di’ak.

Iha okaziaun hanesan, entrega mós ekipamentus agríkolas ba agrikultór sira, inklui tratór no mákina kuda no ko’a hare nian, hodi reforsa mekanizasaun no apoia aumentu produtividade iha área benefisiária sira. Projetu Laivai ne’e ho valór dolar amerikanu millaun 9,36.

Melio de Jesus, Prezidente Autoridade Munisipál Lautein nian, haksolok tebes bainhira hatene katak Governu konsege kria ona kondisaun ba populasaun Lautein, liu-liu iha suku rua ne’e, hodi permite reativa natar atus ba atus ne’ebé abandonadu durante tinan 20, ne’ebé sei aumenta produsaun foos iha futuru.

Iha Galata, iha suku Uato-Hako, Postu Administrativu Venilale, iha loron 10 fulan-janeiru, Primeiru-Ministru inaugura sistema irrigasaun ida, ho objetivu atu fó benefísiu ba natar ektare 720, ne’ebé abranje postu administrativu haat iha munisípiu Baukau, inklui Postu Administrativu Osú, iha munisípiu Vikeke. Durante inaugurasaun, Primeiru-Ministru reafirma nesesidade serbisu hamutuk no prezervasaun infraestruturas. Projetu ne’e ho valór dolar amerikanu millaun 14.

Nune’e mós iha loron 10 fulan-janeiru, iha Baukau, Primeiru-Ministru inaugura reabilitasaun estrada Karavela-Kaisidu-Aeroportu Baukau, kuaze kilómetru ualu, hodi apela ba autoridade sira no populasaun atu tau matan ba estrada ne’e. Projetu ne’e finansia husi Ministériu Planeamentu no Investimentu Estratéjiku, liuhusi Fundu Infraestruturas, ho kustu dolar amerikanu millaun 6 no hetan fiskalizasaun no mós supervizaun husi ADN, IP.

Inaugurasaun iha Lautein no Baukau ne’e hanesan parte ida hosi esforsu hodi reforsa infraestruturas baze atu apoia produsaun agríkola no hadi’a kondisaun mobilidade, ho partisipasaun husi membrus Governu, autoridade munisipál no lokál sira, reprezentante institusionál no komunidade benefisiária sira.