Sekretaria Estadu Seguransa entrega ekipamentu atu ajuda servisu Unidade Patrullamentu Fronteira
Sekretáriu Estadu Seguransa interinu, Júlio Tomas Pinto entrega ekipamentu atu ajuda servisu Polisia Unidade Patrulla Fronteira (UPF) simbolikamente ba Komadante Jerál PNTL, Longuinhos Monteiro, Iha Palásiu Governu, Tersa-feira, loron 2 fulan Marsu. Ekipamentu sira ne’ebé mak hanesan: motorizada 6, televizaun 4, antena parabólika 4, kama 36, moskiteiru 36 no esponza 36.
“Kuandu Estadu harii instituisaun ida, estadu iha obrigasaun atu fó fasilidade ba sira hanesan mós instituisaun sira seluk, tanba ita sei iha faze ida, state building, nation building, ita tenke fó duni fasilidade ba instituisaun Polisia sira, liu-liu sira iha fronteira. Maske iha fasilidade oituan de’it maibé Estadu iha obrigasaun atu fasilita nafatin ita bo’ot sira hodi hala’o servisu di’ak liu iha futuru, tanba ita bo’ot sira (UPF) hala’o servisu iha liña fronteira ne’e, hatudu Timor-Leste ninia karákter, atitude no Timor-Leste nia oin ba nasaun estranjeiru sira”. hateten Júlio Tomas Pinto
Iha fatin hanesan Komandante Geral Polisia Nasionál Timor-Leste (PNTL), Longuinhos Monteiro hateten “Hau agradese Sekretáriu Estadu Seguransa ninia ezersisiu ba apoiu ne’ebé mak fó, maske bele dehan la to’o, maibé bele rezolve uitoan problema balun iha UPF ninian, hanesan, koordenasaun entre elementu ne’ebé mak koloka iha postu ida ba potu seluk, tanba distánsia hosi postu ida ba postu seluk la besik malu.”
