Orienta Juventude tuir nesesidade indústria traballu nian
Sekretaria Estadu ba Formasaun Profisionál no Empregu (SEFOPE) servisu hamutuk ho parseiru OIT (Organizasaun Internasionál Traballu) hodi realiza espozisaun karreira juventude, durante loron rua (25-26/02/2011), iha eis GMT (Gedung Matahari Terbit), Díli.
Objetivu hosi espozisaun ne’e atu fó informasaun no opsaun ba estudante hosi eskola sekundária sira kona-ba téknika profissionál no akademia sira seluk, ne’ebé buka formasaun no servisu, tenik Sekretáriu Estadu ba Formasaun Profisionál no Empregu, Bendito Freitas.
Sekretáriu Estadu fiar katak liu hosi espozisaun karreira ne’e sei fasilita prosesu buka servisu no promove karreira iha setór oin-oin hodi fó informasaun kona-ba profisaun, edukasaun no formasaun profissionál. Nia mós apela ba estudante sira atu bele uza oportunidade ida ne’e ho didi’ak para bele husu informasaun kle’an kona ba edukasaun ka formasaun atu nune’e bele dezenvolve kapasidade tuir nesesidade no ejijénsia indústria traballu nian.
Total númeru estudante ne’ebé mak partisipa hamutuk estudante 3.653.
Iha futuru Governu liu hosi SEFOPE iha ona planu atu halo espozisaun hanesan ho ida ne’e iha tinan-tinan.
