Governu aprova Regulamentu, Vizaun Jerál no Dokumentus Padraun ba aplikasaun Kódigu Aprovizionamentu foun no Kontratus Públikus
Iha sorumutu loron 22 fulan-dezembru tinan 2025, iha Palásiu Governu, Dili, Konsellu Ministrus aprova Dekretu Governu rua ne’ebé aprova Regulamentu ba aplikasaun Kódigu Aprovizionamentu no Kontratus Públikus no ninia Dokumentus Padraun Aprovizionamentu nian, iha ámbitu implementasaun rejime jurídiku foun ba aprovizionamentu no kontratasaun públika ne’ebé sei tama iha vigór, iha loron 1 fulan-janeiru tinan 2026.
Regulamentu ba Aplikasaun Kódigu Aprovizionamentu no Kontratus Públikus no Vizaun Jerál kuadru legál nian ba kontratasaun públika iha Timor-Leste, ho objetivu atu apoia funsionáriu públiku, jestór akizisaun no interveniente sira seluk iha prosedimentu kontratasaun públika nian, hodi asegura orientasaun ida ne’ebé klara, uniforme no operasionál kona-ba aplikasaun Kódigu foun. Dokumentu sira-ne'e sistematiza dispozisaun prinsipál sira hosi rejime jurídiku, klarifika prinsípiu estruturante, métodu kontratasaun no regra sira ne'ebé aplikavel ba kontratus públikus kona-ba beins, servisus no obras.
Dokumentu sira ne’ebé agora aprova ona sei disponibiliza iha Portál Aprovizionamentu nian, iha lian ofisiál sira no ho tradusaun ba lian traballu no aplika ba kontratus públikus ne’ebé selebra hosi servisus no entidades Setór Públiku Administrativu nian, ho objetivu atu garante transparénsia ne’ebé boot liu, efisiénsia hosi prosedimentu sira no previzibilidade iha jestaun hosi rekursus públikus.
Iha sorumutu ne’e, Konsellu Ministrus aprova mós Dekretu Governu ne’ebé estabelese Dokumentus Padraun Aprovizionamentu ne’ebé prevee ona iha Kódigu foun. Dokumentu sira-ne'e organiza ba kategoria tolu — Beins, Servisus no Obras— atu bele fasilita sira-nia utilizasaun tuir natureza kontratu públiku ne'ebé atu halo. Formuláriu sira ne’ebé relasiona ho prosedimentu aprovizionamentu sei disponibiliza hosi Ministériu Finansas liuhosi Portál Aprovizionamentu, no servisu públiku no entidade sira tenke mantein sistema ida ba rejistu prosedimentu ho períodu mínimu tinan sanulu.
Kódigu Aprovizionamentu foun no Kontratus Públikus hetan aprovasaun hosi Dekretu-Lei n. 1/2025, loron 8 fulan-janeiru, iha ámbitu prosesu reforma jestaun finansas públikas ne’ebé hala’o hosi Governu Konstitusionál IX. Diploma ida-ne’e substitui rejime anterior no introdús alterasaun ho objetivu atu moderniza no simplifika prosedimentu kontratasaun públika, reforsa transparénsia, promove utilizasaun ida ne’ebé efisiente liután ba rekursu Estadu no apoia setór emprezariál nasionál, inklui liuhosi rejime preferensiál ida ba fornesedór nasionál sira.
Tama iha vigór Kódigu foun nian adia ona ba loron 1 fulan-janeiru tinan 2026, atu nune’e bele asegura implementasaun ida ne’ebé efikás no koordenada ba rejime jurídiku foun, hodi kria kondisaun nesesária ba ninia aplikasaun tomak no garante seguransa jurídika no kumprimentu ba prinsípius Administrasaun Públika nian.
Ho aprovasaun Regulamentu, Vizaun Jerál no Dokumentus Padraun Aprovizionamentu, Governu konklui etapa esensiál ida ba operasionalizasaun Kódigu Aprovizionamentu foun no Kontratus Públikus, hodi reforsa enkuadramentu normativu ba kontratasaun públika iha ámbitu reforma finansas públikas.
