Governu insentiva organizasaun Imprensa Timor-Leste nian hodi harii Konsellu Imprensa ida iha futuru
Governu Timor-Leste, liu hosi Sekretaria Estadu Konsellu Ministru (SEKM), insentiva imprensa Timor-Leste nian hodi partisipa iha estudu komparativu ida iha Konsellu Imprensa Indonézia nian. Inisiativa ida ne’e, nia objetivu hodi hetan esperiénsia atu kria Imprensa Timor-Leste nian iha futuru, ne’ebé hala’o loron 21 to’o 24 fulan Fevereiru, iha Jakarta.
“Timor-Leste agora daudaun sei iha faze ida atu kria regulamentu hodi regula atividade sira iha komunikasaun sosiál ninian. Hanesan Diretór-Jerál iha órgaun governu nian ne’ebé mak tutela ba komunikasaun sosiál, fiar katak liu hosi estudu ida ne’e, delegasaun imprensa Timor-Leste nian bele aprende no hetan liu tan esperiénsia”, hateten Victor Maia.
Iha fatin hanesan Prezidente Konsellu Imprensa Indonézia, Bagir Manan, hateten ”esperiénsia di’ak ne’ebé mak delegasaun Imprensa Timor-Leste nian hetan liu hosi estudu ida ne’e, bele sai nu’udar referénsia ida hodi harii Konsellu Imprensa Timor-Leste nian iha futuru no Konsellu Imprensa Indonézia iha kompromisu nafatin atu hala’o servisu hamutuk.”
Iha estudu komparativu ne’e, delagasaun imprensa Timor-Leste nian, husu esperiénsia husi Konsellu Imprensa, kona-ba oinsá, Istória harii Konsellu Imprensa, hanesan kompozisaun membru sira nian, Konsellu Imprensa nia independénsia iha kontestu funsionál, lei subsidiária Indonézia nian, relevánsia ho prosesu atu harii Konsellu Imprensa Timor-Leste, orsamentu konsellu imprensa, Prosesu elabora kódigu étika jornalista nian, Oinsá Konsellu Imprensa rezolve direitu Jornalista sira nian, sé mak jornalista no oinsá relasaun Konsellu Imprensa ho Estadu, ho organizasaun impresa sira ne’ebé mak ezisti no ho nain ba impreza ne’ebé jornalita sira servisu ba.
Aleinde halo vizita ba Konsellu Imprensa Indonézia, iha Jakarta, delegasaun Timor-Leste mós hala’o vizita ba Aliansa Jornalista Independente no Unidade Jornalista Indonézia.
Delegasaun iha estudu komparativu ne’e, kompostu hosi, Diretór-Jerál SEKM, Victor Maia; Asesora Jurídika Internasionál ba Komunikasaun Sosiál iha SEKM, Sofia Calado; Asesora Jurídika Nasionál ba Komunikasaun Sosiál iha SEKM, Gina Lopes; Xefe Departamentu Komunikasaun Sosiál iha Diresaun Nasionál Dissiminasaun Informasaun iha SEKM, Orlando da Conceição; Asesór Nasionál Komunikasaun Sosiál iha Gabinete Primeiru-Ministru, António Ramos Naikoli; Sekretáriu-Jerál Press Club Timor-Leste, Mouzinho Lopes; Prezidente Sindikatu Jornalista Timor-Leste, Otelio Ote; Vise Prezidente Asosiasaun Jornalista Timor-Leste, Rosário Martins no Prezidente Interinu Konsellu Administrasaun RTTL, Expedito Dias Ximenes.
