Timor-Leste partisipa iha Konferénsia Estadus Partes Konvensaun Nasoins Unidas nian ba da-11 kontra Korrupsaun
Ministru Negósius Estranjeirus no Kooperasaun, Bendito dos Santos Freitas no ninia delegasaun partisipa iha sesaun Konferénsia Estadus Partes (COSP11) Konvensaun Nasoins Unidas nian ba da-11 kontra Korrupsaun, ne’ebé hala’o husi loron 15 to’o 19 fulan-dezembru tinan 2025, iha Doha, Qatar, ho tema “Forma Integridade Aban nian”. 
COSP11, ne’ebé organiza husi Estadu Qatar iha koordenasaun ho Eskritóriu Nasoins Unidas kona-ba Drogas no Krime (UNODC), halibur Estadus Partes, signatárius, Estadu observadór, organizasaun internasionál, sosiedade sivíl no espesialista sira, forma forum ida atu avalia progresu iha implementasaun Konvensaun, debate dezafius ne’ebé mosu no adota rezolusaun sira ne’ebé orienta prioridades globais kona-ba kombate korrupsaun.
Sesaun abertura ne’e inaugura husi Primeiru-Ministru no Ministru Negósius Estranjeirus Qatar nian, Sheikh Mohammed Bin Abdulrahman Bin Jassim Al Thani. Iha serimónia ne’e, Prezidente sesante husi Konferénsia Estadus Unidus nian, Christine Cline, ofisialmente entrega prezidénsia ba Primeiru-Ministru no Ministru Negósius Estranjeirus Qatar hodi lidera sesaun ida-ne’e.
Iha vídeo ida ne’ebé aprezenta iha abertura ne’e, Sekretáriu-Jerál Nasoins Unidas, António Guterres, apela atu uza teknolojia emerjente iha luta hasoru korrupsaun, krime organizadu no forma krime sira seluk, hodi hateten katak “korrupsaun la’ós krime ida ne’ebé laiha vítima. Hanesan krime ida ne’ebé hamosu konflitus, hametin dezigualdade no hamenus rekursus nesesárius atu proteje ema no planeta ne’e. Kada dolar ne'ebé lakon tanba krime ekonómiku ida-ne'e maka dolar ida ne'ebé na'ok hosi sira ne'ebé hakarak luta ba futuru ida ne'ebé di'ak liu”.
Prezidente Asembleia Jerál Nasoins Unidas nian, Annalena Baerbock, mós subliña katak “prevene no halakon korrupsaun ne’e nu’udar responsabilidade hamutuk. Ita deve ba ema ne’ebé ita servisu ba”.
Nu’udar Estadu Parte ba Konvensaun Nasoins Unidas kontra Korrupsaun, Timor-Leste hetan reprezentasaun iha konferénsia ne’e hosi Ministru Negósius Estranjeirus no Kooperasaun. Parlamentu Nasionál reprezenta husi deputada Virgínia Ana Belo no ekipa Komisaun Anti-Korrupsaun.
Sesaun Konferénsia ba da-11 ne’e sei hala’o to’o loron 19 fulan-dezembru, ho sorumutu plenária, diálogu nivel aas no eventu paralelu sira ne’ebé dedika ba reforsu kooperasaun internasionál no asaun koletiva iha kombate korrupsaun.
