Governu Timor-Leste

Governu liu hosi Ministériu Turizmu Komersiu no Industria (MTKI) fó apoiu orsamentu ho montante U$200.000 ba agensia ETDA (East Timor Development Agency) ba programa kapasitasaun foinsa’e iha área turizmu iha salaun ETDA, Fatuhada, Díli.

Iha serimónia ne’e Diretór Nasionál Turizmu, José Dias Quintas iha nia intervensaun subliña, partisipante sira tenki aproveita didiak oportunidade ne’ebé iha, atu nunee bele aplika iha servisu iha terenu no buat importante ida ne’ebé tenki kaer metin iha ida-idak nia servisu fatin mak disiplina.

Iha oportunidade ne’e, Diretora ETDA agradese tebes ba apoiu ne’ebé Governu liu hosi MTKI fó, hodi sussesu ba programa ne’ebé iha.

ETDA, hanesan organizasaun ida ne’ebé durante ne’e fó kapasitasaun ba foinsa’e sira iha área turizmu no hela fatin. ETDA forma ona foinsa’e lubuk ida, balun konsege hetan ona servisu permanente iha kompañia privadu sira, hanesan hotel, restorante no seluk tan.

Iha programa kapasitasaun, ETDA fó treinamentu oinsa foinsa’e sira bele servisu ho profisionál no étika. ETDA halo kooperasaun ho kompañia privadu sira iha Díli inklui distritu sira no wainhira foinsa’e sira treinamentu hotu durante fulan neen no ba halao estaziu.