Governu Timor-Leste

Vise-Ministru Asuntus Parlamentares, Adérito Hugo da Costa, hala’o enkontrus institusionais ho lider polítiku portugés sira, iha Lizboa, iha loron 9 fulan-dezembru tinan 2025, iha ámbitu vizita  ofisiál ida ho objetivu atu hametin diálogu polítiku no kooperasaun bilaterál.

Vise-Ministru hasoru malu ho Ministru Asuntus Parlamentares  Portugál nian, Carlos Abreu Amorim, iha sorumutu ida ne’ebé permite troka informasoins ida kona-ba mekanizmus koordenasaun nian entre Governu no Parlamentu portugés, ho énfaze liuliu ba papél hosi Ministériu Asuntus Parlamentares iha koordenasaun polítika no ligasaun institusionál entre podér soberania rua ne’e. 

Durante sorumutu ne’e, ko'alia mós kona-ba temas ba interese komún iha planu internasionál, inklui partisipasaun ativa Timor-Leste nian iha Komunidade País Lian Portugés (CPLP, sigla iha lian portugés) no Asosiasaun Nasoins Sudeste Aziátiku (ASEAN), no mós kontribuisaun ne'ebé maka país rua  ne’e bele halo hodi promove inisiativas konjuntas iha espasu luzófonu. 

Nune’e mós durante vizita ofisiál ne’e, Vise-Ministru simu hosi Vise-Prezidente Asembleia Repúblika Portugál, Rodrigo Saraiva, iha audiénsia ne’ebé hala’o iha Palásiu São Bento. Sorumutu ne’e foka kona-ba funsionamentu Parlamentu portugés nian no dezafius no mós oportunidades hosi sistema parlamentár timoroan, hodi promove troka esperiénsias institusionais ida.

Parte rua ne’e  ko’alia kona-ba áreas prioridades  ba kooperasaun bilaterál, ho énfaze ba edukasaun, formasaun ba kuadrus, reforsu institusionál no promosaun lian portugés. Hodi subliña mós papél diplomasia parlamentár nian iha aprofundamentu relasoins inter-parlamentáres  no hametin lasus istórikus entre nasaun rua ne'e.

Vise-Ministru Adérito Hugo da Costa haktuir hikas kompromisu Governu Timor-Leste nian atu kontinua hametin kualidade prosesu lejizlativu no koordenasaun entre órgaun soberania sira, ho rekoñese Asembleia Repúblika Portugál nu’udar referénsia ida ba maturidade institusionál no fonte aprendizajen relevante ida ba modernizasaun parlamentár nasionál.

Sorumutu sira ne’e hala’o iha ambiente ida ne’ebé amizade no kooperasaun, hodi hametin lasus istórikus, polítikus no kulturais ne’ebé halo Timor-Leste no Portugál sai hamutuk, no mós kontribui ba hametin diálogu institusionál no kooperasaun bilaterál.